Эрен Дердийок: “Тез орада ўзбек тилини ҳам ўзлаштираман”

- “Пахтакор”нинг сизга қизиқиши тўғрисида қачон билдингиз?
Шота Арвеладзенинг бу ерда ишлаётганини билардим. Таклиф ҳақида билганимдан кейин бу менга қизиқарли туюлди. Чунки мураббийнинг қандай футболни ёқтириши, иш услуби ва фалсафасидан хабардорман. “Пахтакор” иштирокидаги бир неча ўйинларни томоша қилдим. Жамоа ўйинида ўрним бўлиши мумкинлигини англадим ва таклифни қабул қилиб, “Пахтакор”га келишга қарор қилдим.

- Ўзбекистон ва “Пахтакор” ҳақида нималарни билардингиз?
Тошкент ва мамлакат тўғрисида баъзи нарсаларни билардим. “Пахтакор”нинг Осиё Чемпионлар лигасидаги баъзи ўйинларини кўргандим. Шунингдек, терма жамоанинг Осиёда кучлилардан бири эканидан хабардорман.

- Мослашиш жараёни қандай ўтмоқда?
Жуда яхши. Турк ва ўзбек менталитети ўртасида унча катта фарқ йўқ. Шунингдек, жамоадошларим ҳам биринчи кунданоқ илиқ муносабатда бўлиб, тез чиқишиб кетишимга ёрдам беришмоқда. Мураббийлар штабига ҳам ўз миннатдорчилигимни билдираман. Жамоадошларим мен туркча гапирганимда тушуна олишади, ҳозирча мен ўзбек тилини унча тушунмаётган бўлсам ҳам. Бунда тилларнинг ўхшашлиги ёрдам беради. Баъзи йигитлар билан инглиз тилида мулоқот қиламан. Тез орада ўзбек ва русчани ҳам ўзлаштираман деб ўйлайман.

- “Пахтакор” билан мақсадларингиз қандай?
Жамоага қўлимдан келганча ёрдам бермоқчиман. Ўзбекистон чемпионати ва кубок мусобақаларида ғолиб бўлишда ҳисса қўшиш, Чемпионлар лигасида олдимизга гуруҳдан ўтиш ва турнирда имкон қадар яхши натижа кўрсатиш қўйилган. Буни уддалашда ёрдам бермоқчиман. Шундай экан, биз ушбу мақсадлар йўлида меҳнат қиламиз.