Элдор Мойлиев: "2003-2004 йилда туғилган футболчини ёш ҳам деб бўлмайди"

"Арал" жамоасини курашувчан футбол кўрсатишини билар эдик. Дастлабки 15-20 дақиқалик тенгкурашлар остида ўтди. Гол уриб олганимиздан сўнг тўп билан ва тўпсиз ўйинни назорат қилдик",- дейди Элдор Мойлиев.

- Шаҳбоз Нуриддинов иккинчи бўлимда майдонга тушди. Унинг ҳаракатларини қандай баҳолайсиз?

- Шаҳбоз келажаги порлоқ футболчи, ҳозирда жисмоний ҳолатида бироз муаммо бор. Мураббийлар берган юкламалар билан индивидуал шуғулланмоқда. У асосий таркибга рақобат қила оладиган футболчи. Чидамлилиги бироз панд бераётганини айтмаганда бугун ҳам рақибга анча қийинчилик туғдирди.

- "Шўртан" бугун тўпга ҳаракат ва яккакурашларда қандай ҳаракат қилди деб ўйлайсиз?

- Тўрт кундан сўнг "Сурхон"га қарши яна ўйинимиз бор. Шу боис тўпсиз ўйинни назорат қилдик, тўп жамоамизда бўлганида ҳам назорат қилдик. Албатта, хато ва камчиликларимиз бор. Футбол хатоларсиз бўлмайди. 

- Сиз келганингиздан сўнг "Шўртан"да натижалар кўрина бошлади. Сиз ҳозир ҳам вақтинчалик мураббий мақомидамисиз? Бу давом этадими?

- Ҳа, вақтинчалик мураббийман. Қолганини раҳбарият ҳал қилади. 

- Кўп интервьюларингизда раҳбарият ёшларга эътибор бераётганини айтгансиз. Бундан келиб чиққанда давралар оралиғида катта ўзгариш бўлмайди?

- Ўзимизга керакли ҳужумчини кўз остимизга олиб қўйганмиз. Шу билан бирга ёшларимиз ҳам бор, ўйнатамиз. Бошқа позицияларга тажрибали футболчилар керак бўлса, кўриб чиқамиз. Бу жараёнда ҳали. Марказий ҳимояга ҳам футболчи олишни ўйлаб турибмиз. Иқтидорли ёшларимизни иккинчи даврада таклиф қиламиз. 

- Ушбу таркибга икки нафар тажрибали футболчини қўшган ҳолда Суперлигада қолса бўладими?

- Суперлигада сақлаб қолса бўлади албатта. Ҳозирги йигитлар ҳам иқтидорли. Эътибор берсангиз, ёшлигида турли терма жамоаларда ўйнашган. Фикрлаш қобилияти кучли. 3-4 нафар ҳужумни якунловчи футболчи олсак уддалаш мумкин. 2003-2004 йилда туғилган футболчиларни ёш ҳам деб бўлмайди. 

- "Арал" принципиал рақиб ҳисобланади. Нима деб ўйлайсиз, "Шўртан" Суперлигада кучайишга эришдими?

- Ўтган йилги ўйинларни кузатганим йўқ. Барибир Суперлига ва Про лига даражасида фарқ бор. Мавсум бошида Суперлигада ўйнаган футболчиларни жалб қилганмиз. Балки шунинг учундир.