Элдор Адҳамов: "Сурхон"га қарши баҳсда бор кучимиз билан ўйнаймиз"

Ушбу баҳсдан олдин меҳмонлар дарвозабони Элдор Адхамов билан суҳбатлашдик.

- Суперлиганинг ўтган турида "Андижон" жамоаси Навоийнинг "Қизилқум" жамоаси билан куч синашди ва муроса кўчасини танлашди. Ушбу учрашув ҳақида нима дея оласиз?
- "Қизилқум" билан бўлган ўйинда жамоамиз учун қийин бўлди, бизга ғалаба жуда муҳим эди. Ҳужумлар уюштиришда камчиликлар юзага келди ва якунда бир очко билан чекландик.

- Дарбозабон ярим жамоа ҳисобланади, кўп вазиятларда "Андижон" жамоасини муқаррардан голлардан сақлаб қолмоқдасиз, лекин "Бунёдкор" жамоаси билан бўлган учрашувда ўйинингизда пасайиш сезилди?
- Дарбозабон асосан руҳан ўйинга тайёр бўлиши керак, баъзи учрашувларда омадсиз ўйинлар ҳам бўлиб туради ва шундай ҳолатларда тезроқ эсдан чиқариб кейинги ўйинларга тайёргарлик кўриш керак бўлади. "Бунёдкор"дан учралган мағлубиятдан сўнг камчиликлар борлигини ҳис этиб, "Қизилқум" жамоаси билан бўлиб ўтган ўйинда ишончли ўтказиб аввалги ўйинда тасодиф эканлигини қайсидир маънода буни исботладим деб ўйлайман.

- Жорий мавсумда "Андижон" жамоаси бир маротаба ғалабага эришди ва ягоналигича қолмоқда. Сизнингча, жамоанинг ғалаба қозонишига нима етишмаяпти?
- Жамоада аксарият ўйинчилар ёш, оз бўлсада тажриба етишмаяпти. Ҳужумчиларга бир оз омад юз ўгирмоқда, мураббийлар камчиликлар устида астойдил меҳнат қилишмоқда. Насиб бўлса кейинги турда ғалаба қозониб мухлисларни хурсанд қиламиз.

- Элдор, нима деб ўйлайсиз ушбу мавсумда "Андижон" жамоаси Суперлигада жон сақлаб қола оладими?
- Жамоамиз Суперлигада қолишлиги учун бор кучимиз билан ҳаракат қиламиз ва насиб бўлса буни уддалаймиз.

- "Андижон" жамоаси кейинги 22-турда турнир жадвалида ёнма-ён келаётган "Сурхон" жамоасига қарши сафарда майдонга тушади. Бу ўйиндан олдинги фикрларингиз...
- Ушбу баҳсда жамоамизга қийин бўлиши аниқ, сабаби рақибимиз ҳам Суперлигада ўз ўрнини сақлаб қолиш учун кураш олиб бормоқда. Шунинг учун ғалаба қозонишимиз керак ва мухлисларни кайфиятини кўтариш учун бор кучимиз билан ўйнаймиз.

Нодирбек Абдуллаев суҳбатлашди