Эдгар Гесс: "Уйда икки очко йўқотдикми? Нимадир дейиш қийин"

 -Ўйин қизиқарли ўтди. Бугун иккала жамоа ҳам тенг ўйин намойиш этгани боис дуранг натижаси қайд этилди. Майдоннинг ҳар бир қарич ерида кураш кескин кечди ва иккала жамоа ҳам яхши ўйин кўрсатди дея оламан. Абдумалик Абдуллаевни нима учун алмаштирдим? Учрашув якунланишига 5 дақиқа қолганди ва бунгача у кўп куч сарфлаганди. Шу сабабли алмаштиришга қарор қилдим. Абдумалик бугунги баҳсда ҳам жуда фаол ҳаракат қилди.

Уйда икки очко йўқотдикми? Бу ҳақда аниқ бир нима дейиш қийин. Биринчи бўлимда меҳмонлар яхши ҳаракат қилиб, бир қатор хавфли вазиятларни юзага келтиришди. Иккинчи таймда эса бизда гол уриш учун имкониятлар кўпроқ бўлди. Ўйин шундай эдики, агар бугун ким гол урса, ўша жамоа ғалаба қозонарди. Аммо дарвозалар дахлсиз қолди. Бугун икки очкони бой бердикми ёки йўқ, буни мавсум охири кўрсатади. Муҳими, ҳимояда хатога йўл қўймай тўп ўтказмадик. Дуранг ҳам бу очко деганидир. Бугун бизни муносиб даражада қўллаб-қувватлашгани учун мухлисларимиздан миннатдормиз. Кейинги ўйинларда ҳам ишқибозларимизни хурсанд этишга ҳаракат қиламиз.