Драган Скочич: "Терма жамоада "қора рўйхат" йўқ"

ЖЧ-2022 саралаш босқичидан ўрин олган навбатдаги тўрт ўйинни Эрон Гонконг, Камбоджа, Баҳрайн ва Ироққа қарши ўтказади. Гуруҳдаги вазиятдан келиб чиқиб форслар барча учрашувларда ғалаба қозонишлари шарт. 

"Мен фақат энг кучли футболчиларни терма жамоага чақираман, қўлимда ҳеч қандай "қора рўйхат" йўқ, - дейди эронликлар устози Драган Скочич. - Қачон ҳукумат рухсат бериб машғулотлар бошланадиган бўлса, энг яхши ўйинчилар сафимизда бўлади". 

Эрон терма жамоаси Карлуш Кейруш танлаган ҳимоявий ўйин кўрсатадими ёки Марк Вильмотс маъқуллаган ҳужумкор услубми? 

Бу саволга жавоб берар экан хорватиялик мураббий шундай деди: "Терма жамоанинг ўз ўйин услуби бўлади. Биз турли йўналишларда ўйнаб кўрамиз, Сизга ҳозирча шуни айтишим мумкин, мен ҳимоявий футболни танламайман. Матбуот мен ҳақимда турли гапларни ёзяпти. Эмишки ўрнимга Андреа Страмаччиони билан Габриел Кальдерон номзоди кўриб чиқилаётган экан. Лекин мен бу гапларга эътибор бермайман. Мана кўрасиз, ҳали ўйинлар бошлансин биз ўз мақсадимизга эришамиз".