Достонбек Ҳамдамов: “Биргина соврин билан тўхтаб қолмоқчи эмасман”

15 январь куни терма жамоамиз футболчилари ОАВ вакилларининг саволларига жавоб қайтаришди. “Бунёдкор” матбуот хизмати олимпия терма жамоасидаги “Бунёдкор” вакилларининг фикрлари билан қизиқди. Ҳужумкор ярим ҳимоячи Достонбек Ҳамдамовнинг дастлабки учрашув ва кейинги баҳс олдидан билдирган фикрлари қуйидагича янгради.

- Мусобақа биз учун омадсиз бошланди. Жанубий Корея термаси Осиёнинг энг кучли жамоаларидан ҳисобланса-да, уларга муносиб қаршилик кўрсатдик. Ҳозирги пайтда мағлубиятни унутганмиз. Энди олдимизда турган баҳслар ҳақида ўйлаяпмиз. Айни пайтда бор эътиборимизни Ироқ билан бўладиган учрашувга қаратганмиз. Умид қиламанки, Ироқ термасини мағлубиятга учратиб, мухлисларимизни хурсанд қиламиз. Осиёнинг энг яхши ёш футболчиси учун аталган совринни қабул қилиб олдим. Мен биргина бу ютуқ билан тўхтаб қолмоқчи эмасман. Ҳали олдинда жуда кўплаб учрашувлар бор. Ўзимни яхши сифатларимни кўрсатиб, янада юксак марраларни забют этишга ҳаракат қиламан, - дейди Достонбек Ҳамдамов.