Дилшод Нуралиев: "Нукусдаги ўйиндан қониқмадим, лекин натижа бор"

- Ўйин ҳақида қандай фикрдасиз?
- Учрашув осон кечмади. Биз доим табиий майдонда тўп сурардик, бугун эса суниий майдонда ўйнадик. Балки шу боисдир ўйинимиз унчалик ҳам чиқмади. Лекин барибир йигитларга раҳмат. 4:1 ҳисобидаги натижани қўлга киритганлари учун. Ўйиндан кўнглим тўлмади, бироқ натижа бор. Шунинг учун ҳам йигитларга катта раҳмат айтаман.

- "Сурхон" жамоасининг олдига қандай мақсад қўйилган?
- Олдимизга иложи борича юқори натижани кўрсатиш қўйилган. Суперлигага чиқишни вақт кўрсатади. Менимча бундай ўйин билан бизга қийин бўлади. Ҳали футболчиларнинг ўзаро бир-бирларини тушинишлари қийин бўляпти. Озгина вақт керак бизга.

- Нукусда йирик ҳисобда ғалаба қозонишингизни кутганмидингиз?
- Ғалаба қозонишга ҳаракат қиламиз деб келган эдик. Чунки олдимизга шундай вазифа қўйилган эди. Сунъий майдонда ўйнаш бизлар учун қийин бўлди. Лекин йирик ҳисобда ютамиз деб ўйламаган эдим.

- "Орол" жамоасидан кимни алоҳида эътироф этган бўлардингиз?
- Мен "Орол" жамоасининг ўйинига қарамадим. Чунки ўзимнинг жамоамга кўпроқ эътибор бердим. Нукусликлардан ҳеч кимни алоҳида эътироф этолмайман. Лекин Наврўз Алимовни яхши билганим учун, унга алоҳида эътибор қаратдик. Чунки у иккинчи қаватларда яхши курашади, тўп билан яхши муомала қила олади.

 - Фарход Тоджиевнинг ўйинидан кўнглингиз тўлдими?
- Йўқ. Мен ҳеч бир шогирдимнинг ўйинидан қониқмадим. Чунки ҳали кўп ишлашимиз керак.

Фурқат Юсупов ёзиб олди