Дилшод Жабборов: "Тинимсиз меҳнат орқали ижобий натижаларга эришиш мумкин"

"Лочинлар" пешқадамлар сафида боришмоқда. Жамоанинг тажрибали ярим ҳимоячиси Дилшод Жабборовнинг ушбу ғалабаларда хиссаси албатта катта. У хатто майдонга тушмаганда ҳам шерикларини руҳлантириб туради ва ёшларни қўллайди. Биз Жабборов билан суҳбатлашишга қарор қилдик.

- Суперлига "Навбаҳор" учун омадли давом этмоқда десак муболаға бўлмаса керак. Жамоа ўз уйида ҳеч кимга ютқазмаяпти, май ойидаги барча ўйинларда ғалаба қозондинглар. Ғалабаларнинг сири нимада?
- (ўйланиб) Меҳнат. Фақат тинимсиз меҳнат орқали ижобий натижаларга эришиш мумкин. Машғулотларда ҳар бир ўйинга жиддий тайёргарлик кўраяпмиз. Айтишадику машқда қийин бўлса, жангда осон бўлади деб.

- Ушбу ғалабаларда бош мураббий Илҳом Мўминжоновнинг хиссаси қандай?
- Албатта бош мураббийнинг хиссаси жуда катта. Илҳом Мўминжонов ўзи ҳам футболчи бўлган, шу боис биз билан ишлашда ҳеч қандай қийинчиликка дуч келмаяпти. Бундан ташқари жамоада мураббийлар штаби ҳам самарали фаолият олиб бормоқда. Ҳар бир инсоннинг жамоа ғалабаларида озми-кўпми хиссаси бор албатта.

- Ўтган йилларда Дилшод Жабборов "Навбаҳор" сафида асосий таркибда майдонга тушиб тўлиқ ўйнарди. Бу мавсумда эса негадир жуда кам майдонга тушаяпсиз. Бунинг сабаби нимада?
- Биласизми жароҳатлар футболнинг ажралмас қисми ҳисобланади. Ўтган йил охирида жароҳат олгандим. Бундан ташқари бу мавсумда ҳам турли жароҳатлар мени таъқиб қилмоқда. Шу боис ҳам бир нечта учрашувларда иштирок эта олмадим. Бугунги кунда ўзимни яхши ҳис қилаяпман.

- Бу йилги мавсумда энг қийин кечган баҳс қайси?
- Суперлигада жамоалар сони камайгани туфайли бўлса керак ҳар бир баҳс жуда қизиқарли ўтмоқда. Ҳеч бир жамоа осонликчда ютқазмаяпти. Энг қийин учрашув "Бухоро" билан сафарда ўтган ўйин бўлди деб ўйлайман. Шукурки ўша оғир баҳсда ғалаба қозона олдик.

- Куни кеча Шерзод Каримов "Навбаҳор" клубига ўтгани ҳақида хабар чиқди. Ушбу футболчи жамоани қанчалик кучайтиради деб ўйлайсиз?
- Шерзод Каримов тажрибали футболчи ҳисобланади. У кучли клубларда ўйнаган, бундан ташқари Ўзбекистон ёшлар терма жамоасида Жаҳон чемпионатида иштирок этган. Менимча Шерзод "Навбаҳор"га кўп фойда келтиради деб ўйлайман. Жамоада кучли футболчилар кўп бўлгани яхши, бу орқали рақобат кучаяди ва сифат ошади.

- Ушбу мавсум "Навбаҳор" ва Суперлига кашфиёти бўлган Азизбек Турғунбоев ҳақида нима дея оласиз?
- Азизбек Турғунбоев ҳозирда айни ўйнайдиган ёшда. У жуда ҳам меҳнаткаш йигит. Ўз устида кўп ишлагани учун шундай ютуқларга эришмоқда ва голлар урмоқда. Бекорга уни Ўзбекистон миллий терма жамоасига чақиришмаяпти.

- "Навбаҳор" сафида Остон Ўрунов асосий таркиб ўйинчисига айланиб бормоқда. У ҳақида фикрингиз қандай?
- Ёш бўлишига қарамай Остон Ўрунов жамоамиз сафида мунтазам ўйнаб келмоқда. Қобилиятли футболчи. У ўтган йил иккинчи даврадан бошлаб "Навбаҳор"да ўйнаб келмоқда. Машғулотларда яхши ишламоқда ва шунга яраша мураббийлар унга ишонч билдиришмоқда. Остон эса бу ишончга муносиб жавоб бермоқда.

- Ўтган ҳафта Ўзбекистон миллий терма жамоаси икки карра Жаҳон чемпиони, ЖЧ-2018 иштирокчиси Уругвай терма жамоаси билан ўртоқлик учрашуви ўтказди. Ушбу баҳс ҳақида фикрларингиз...
- Учрашувни кўрганлар Уругвайнинг даражаси биздан анча кучли эканлигини тушунишди. Келажакда бизнинг ҳам терма жамоамиз ушбу даражага чиқади деб умид қиламиз. Натижадан қатъий назар мана шундай кучли шундай терма жамоалар билан кўпроқ ўйинлар ўтказишимиз керак. Луис Суарес, Эдинсон Кавани каби юлдузларга қарши ўйнаш орқали ёш футболчиларимиз жуда катта тажрибага эга бўлишди деб ўйлайман.

- "Навбаҳор" мухлислари ҳақида нима дея оласиз?
- Наманганлик мухлислар "Навбаҳор"нинг ҳақиқий 12-ўйинчиси ҳисобланади. Барча ўйинларда мухлислар стадионга келиб бизни қўллаб-қувватлаб туришади. Биз мана шу мухлислар учун ҳам ўйнаймиз ва ғалаба қозониб уларнинг кайфиятларини кўтаришга интиламиз. Ҳар бир мухлисга жамоамиз номидан миннатдорчилик билдириб ўтмоқчиман.

Нарзулла Сайдуллаев суҳбатлашди