Денис Коростиченко: "Ўзбекистон U-16 терма жамоасига ёрдамим керак бўлган барча жабҳада кўмаклашишга тайёрман. "Локомотив" - "Олимпик" ўйинида ...га мухлислик қилдим"

"Локомотив" ва "Олимпик" жамоаларининг собиқ бош мураббийи Денис Коростиченко яқинда Ўзбекистон U-16 терма жамоаси мураббийлар штабига қўшилиб, Сергей Чигодаевга ёрдам бермоқда. 

— Ўзбекистон U-16 терма жамоаси мураббийлар штабига қандай келиб қолдингиз?

— Сергей Чигодаев билан кўп йиллардан бери танишмиз, бирга ишлаганмиз. Айтиш мумкинки, мураббий сифатида бирга улғайганмиз. У Ўзбекистон U-16 терма жамоасига бош мураббий этиб тайинланиши биланоқ бирга ишлаш истаги пайдо бўлган эди, бироқ ўшанда мен "Олимпик"да фаолият юритардим. Бундан ташқари, терма жамоадаги, айниқса ўсмирлар жамоасидаги иш бироз беқарор — ҳар бир ярим–икки ойда бир марта йиғин ўтказилади, холос. Шу боис "Бунёдкор-Фарм"да доимий иш топдим ва ЎФА ҳамда Сергей Чигодаевнинг тавсияси билан пировардида Ўзбекистон U-16 терма жамоасига ҳам таклиф этишди.

— Ўзбекистон U-16 терма жамоасидаги вазифаларингиз нималардан иборат? Кўпроқ жисмоний тайёргарлик устида ишлаш, машғулот жараёнида кўмаклашишдан иборатми ёки тактика бўйича ёрдам бериш?

— Баъзан жисмоний тайёргарлик бўйича, баъзан таҳлил ишлари бўйича ёрдам бераман. Лекин, аслида, менинг ёрдамим зарур бўлган ҳар қандай жабҳада кўмаклашишга тайёрман.

— "Олимпик"дан кетганингиздан сўнг бош мураббий сифатида ишлаш учун таклифлар бўлганми? Эҳтимол, Суперлига ёки Про лига жамоаларидан?

— Иккита таклиф бор эди, аммо шартлар бўйича келиша олмадик.

— Собиқ жамоаларингиз – "Локомотив" ва "Олимпик"ни кузатиб борасизми? Айниқса, улар яқинда ўзаро тўқнаш келишган эди.

— Албатта! Ўзбекистон U-16 терма жамоаси машғулотларидан кейин ўша ўйинни томоша қилдик.

— Қайси жамоага кўпроқ мухлислик қилдингиз: "Локомотив" ёки "Олимпик"?

— Бу ўйинда кўпроқ "Олимпик"га мухлислик қилдим. Чунки у ерда ёшлар бор ва бош мураббий Мирко Еличич, у билан бирга ишлаганмиз. Шахсан унинг учун ҳам мухлислик қилдим.

— Ҳозирда Ўзбекистон терма жамоасини бошқараётган Тимур Кападзе билан узоқ вақт бирга ишлагансиз. У сизни терма жамоа мураббийлар штабига таклиф қилмаганмиди?

— Тимур Тоҳирович билан алоқада бўлиб турибмиз. У мени Ўзбекистон терма жамоасига чақирмади, чунки у ерда эски мураббийлар штаби (Сречко Катанецнинг ёрдамчилари) қолган эди. Аммо ҳозирча бу ҳақда ўйлашга эрта, энг муҳими — жаҳон чемпионатига йўл олиш масаласини ҳал қилиш.