Денис Коростиченко: "Иккинчи таймда бир киши кўп бўлиб ўйнаганимизга қарамасдан, айтарли вазиятлар ярата олмадик"

- Ўйин ҳақида

- Ўйин жуда кескин руҳда кечди. Талайгина имкониятлар юзага келди. Икки жамоа ҳам турнир жадвалида ўзига ярашмайдиган ўринларда кетаётгани боис ғалаба муҳим эди. Асосий вазифамиз 3 очкони қўлга киритиш эди, аммо бунинг уддасидан чиқа олмадик. Иккинчи таймда бир киши кўп бўлиб ўйнаганимизга қарамасдан, айтарли вазиятлар ярата олмадик, чунки "Бунёдкор" яхши ҳимояланди ва қарши ҳужумга ўтиб кетишга уринди. Умуман, бу режа уларга иш берди. Умумий қилиб олганда, ўйин тенг курашлар остида ўтди.

- Бугун икки жамоанинг ҳам куни эмас экан. 3 та гол ҳисобланмади, пенальтидан тўп киритилмади, яна бир пенальти бекор қилинди. Бугун икки жамоа учун "қора кун" десак бўладими?

- Билмадим. Бу – футбол. Ҳамма нарса бўлиши мумкин. Пенальтидан баъзида гол урилади, баъзида эса йўқ. ВАР бор эди, балки бекор қилиб тўғри қилгандир. Ҳали кўрмадим. "Қора кун" деб айтолмайман, лекин омадсиз кун бўлди дейишим мумкин. Балки пенальтидан унумли фойдаланганимизда, ҳаммаси бошқача бўларди.

- Пенальти тепишни нега Жасур Жалолиддиновги ишониб топширдингиз? Одатда жамоа сардори тепарди...

- Одатда биз ким кўпроқ тепишини ва ундан фойдалана олишини инобатга олиб, стандарт ижрочиларини белгилаб оламиз. Биринчи даврада Диёржон Туропов кўп тепарди. Гоҳ у, гоҳ Кахи Махарадзе пенальти тепувчимиз эди. Бу гал биз буни Жасур Жалолиддиновга ишониб топширдик. Ҳечқиси йўқ, кейинги сафар унумли фойдаланади.