Даврон Файзиев мағлубиятда барча айбни ўз бўйнига олди ва самарқандлик мухлисларга мурожаат қилди

"Иккинчи даврани мағлубият билан бошлаш доим ёқимсиз. Ҳар бир мураббий ғалаба қозонишни истайди.

Таркиб танлашда хатога йўл қўйдим. Бугунги мағлубиятда барча айбни ўз бўйнимга оламан. Шогирдларимга ишонаман. Бугунги ўйин мухлисларга ёқди деб ўйлайман. Кўп вазиятлар яратилди ва кўп голлар урилди. Ўтказилган голларда дарвозабонимиз эмас ҳимоя ва ярим ҳимоячиларимизнинг айби кўпроқ.

Футболда кимдир ютади, кимдир ютқазади. Учрашувдан олдин футболчиларга биринчи даврани унутишларини сўрагандим.

Ёзги барча трансферларни амалга ошириб бўлдик. Ботирали Эргашев ва Шоҳруҳ Абдураҳмоновни "Пахтакор"дан тўлиқ сотиб олдик. Бунинг ўрнига легионер футболчи олиб келишим мумкин эди, аммо раҳбариятга айнан шу икки футболчи кераклигини айтдим.

Баҳодир Насимов самарқандлик бўлгани учун йил охиригача ижарага олдик.

Тўғри бугун ҳакам хатога йўл қўйди. Аммо самарқандлик жонкуяр мухлисларга стадионда ҳакамни хақорат қилиш ярашмайди. Шу боис кейинги сафар бундай қилмасликларини илтимос қилиб қолардим", - дейди Даврон Файзиев.