Coca Cola Суперлигаси. Август ойи лауреатлари

Ой дарвозабони - Игнатий Нестеров
Навоийнинг "Қизилқум" клубига кўчиб ўтган тажрибали посбон Игнатий Нестеров август ойида 4та ўйиннинг барчасида майдонга тушди ва жамоасини бир неча бор муқаррар голлардан сақлаб қолди. Мана шу тўрт ўйинда ўз дарвозасидан 3та гол ўтказиб юборди. "Бунёдкор"га қарши баҳсда Нестеров пенальтидан гол ўтказди. Шу боис Игнатий Нестеров championat.asia талқинига кўра август ойининг энг яхши дарвозабони деб топилди.

Ой голи - Шерзод Каримов
Термизнинг "Сурхон" клуби 10-турда "Навбаҳор"га қарши ўйнади. Учрашувда ҳисобни Шерзод Каримов томонидан урилган гол очиб берди. Каримов бурчакдан тўпни тўғри рақиб дарвозасига жойлаб қўйди ва ҳақли равишда ой голи сифатида эътироф этилди.

Ой футболчиси - Ойбек Бозоров
"Насаф" ярим ҳимоячиси Ойбек Бозоров август ойида жуда ҳам ажойиб ўйнади. Ёзнинг сўнгги ойида Бозоров 1та гол урди ва 1та голли пас берди. Бундан ташқари барча учрашувларда рақиб ҳимоячиларига ҳақиқий бош оғриқ бўла олди. Бозоров ўсишдан тўхтаб қолмаса яқин орада терма жамоамизнинг асосий футболчиларидан бирига айланишига шубҳа йўқ. Championat.asia талқинига кўра Ойбек Бозоров август ойининг энг яхши футболчиси деб топилди.

Ой мураббийи - Шота Арвеладзе
Август ойида "Пахтакор" 4та ўйин ўтказди ва барчасида ғалабага эришди. "Шерлар" 16та гол уриб атиги 2та гол ўтказиб юборишди. Ҳар уч кунда ўйнаб умуман очко йўқотмаган "Пахтакор" бош мураббийи Шота Арвеладзе championat.asia талқинига кўра август ойининг энг яхши мураббийи деб топилди.