Чемпион аниқ, аммо "фантастик тўртлик"ка яна кимлар киради?

“Арсенал” = 6 ўрин, 45 очко (1 ўриндан — 27 очко, 4 ўриндан эса — 7 очкога орқада)

Нега кучли тўртликка киради?
Венгер “Арсенал” АПЛ топ-4дан ўрин эгаллаб, келгуси мавсум Чемпионлар Лигасига йўлланмани қўлга киритишига ишончи комил. Бироқ, “Канонир”ларнинг бошқа имконияти ҳам бор, яъни “Манчестер Юнайтед” кўз ўнгида Европа Лигасида ғалаба қозониш. Лекин, жаноб Арсен ЕЧЛ йўлланмаси учун кураш айнан Премер-Лигада ўтказилиши керак деб туриб олди. Англия Чемпионати якунланишига яна 11та тур бор. Шундай экан, “канонир”лар зафар қучишига ҳали умид бор. Ахир, улар қишда таркибни яхшигина кучайтиришди: жамоага Обамеянг ва Мхитарян келиб қўшилди, Озил билан шартнома муддати узайтирилди. Янги ўйинчилар жамоага мослашишига ммаълум вақт керак бўлади, лекин бу мағлубиятга учраш учун сабаб бўлолмайди. Айниқса, “Арсенал”ни кутиб турган ўйинларга назар ташлайдиган бўлсак, жиддий рақиблардан фақат “Манчестер Юнайтед” билан биргина учрашув қолди, холос.

Нега кучли тўртликка кира олмайди?
“Арсенал” тўртликка кириш учун тинимсиз ўз устида ишлаши керак, бироқ мана бир неча йилдирки бунга бироз эътибор қаратмаяпти. Тўғри, таркибда кучли ўзгариш юз берди: Обамеянг, Мхитарян келди, Озил жамоани ташлаб кетмади. Аммо бир-икки йил жамоанинг асосий ҳалоскори дейилган Санчес клубни тарк этди. Венгер айтиб ўтганимиздек, ҳамон АПЛ топ-4лигидан умидини узмаган. Бу курашда эса руҳий томонлама кучли бўлмаган клуб учун Европа Лигаси ортиқча бош оғриқ бўлиши мумкин. Балки лондонликлар устози ўтган йил ҳамкасби Моуриньо қилган ишни такрорлагани яхшироқмиди... Ёдингизда бўлса керак, португалиялик мураббий вақтида АПЛдан фойда чиқара олмаслигини тушунди ва бор эътиборни Европа Лигасига қаратди. Якунда клуб музейи учун янги соврин ва ЕЧЛ йўлланмаси ҳам кармонда. Ҳамма хурсанд, ҳамма бахтли эди.  

“Тоттенхэм” = 5 ўрин, 52 очко (1 ўриндан — 20 очко орқада, 6 ўриндан — 7 очко юқорида)

Нега кучли тўртликка киради?
Маурисио Почеттино жамоа билан ишлашда аниқ ва изчил ёндашувга эга, бу “шпорлар” ўйинда мувозанатни сақлаб туришларига ёрдам бермоқда. “Тоттенхэм” бу мавсумда нафақат “Арсенал” балки МЮ ва “Ливерпул”, ҳаттоки, Чемпионлар Лигасида Мадриднинг “Реали” устидан ғалаба қозонишга муваффақ бўлди. “Шпорлар”га рақиб ким бўлишининг фарқи йўқ, улар рақиб таркибидаги юлдузли номлардан қўрқишмайди. Буни куни-кеча Чемпионлар Лигаси плей-офф босқичида “Ювентус” билан бўлган баҳсда ҳам кузатдик. “Тоттенхэм” ўзига ишонади ва муваффақият қозониш учун ўз устида кўп ишлайди. Бугунги кунда “шпорлар” жамоавий ўйин ва руҳий томондан кўплаб рақибларни ортда қолдирадилар.

Нега кучли тўртликка кира олмайди?
Рўйхатимиздаги барча жамоалар сингари, далиллар рақиблар кучига қарши чиқади: кимдир доим кимдандир кучлироқ ва омадлироқ бўлади. Чемпионлар Лигасидаги муваффақиятли иштирок “Тоттенхэм”нинг АПЛдаги ишларига ҳалал бериши ҳеч гап эмас. Тарихда бунга кўп бор гувоҳ бўлганмиз. “Шпорлар” “Ювентус”дан ўтишлари керак, ахир гуруҳда Чемпионлар Лигасининг амалдаги ғолиби “Реал Мадрид” ҳам таслим қилинганди. Яъни бугунги “Тоттенхэм” туринликлар билан бемалол беллаша олади. Бироқ захира ўриндиғи бир неча фронтда бир текис кураш олиб бориш ва клуб олдига қўйилган вазифаларни бажариш учун етарли даражада узун эмас. Бир неча кун олдин, нафақат АПЛда балки бутун дунёда ҳам энг кучли таркиблардан бирига эга Пеп Гвардиола интервью берар экан, “Бир нечта фронтда кураш олиб бориб, кўплаб совринларга эга чиқиш учун иккита тенг кучли таркиб керак”, деди. Иқтидорли Почеттинода эса араб шайхларининг пуллари йўқ. Шундай экан, Чемпионлар Лигаси мусобақаси жамоа АПЛни омадли якунлаши ва “кучли тўртлик”ка кириш вазифасини бажаришидан чалғитувчи омил бўлиб хизмат қилиши мумкин. Тўғри жамоа ҳозир яхши спорт формасида. Аммо тасаввур қилиб кўринг, ҳозирги таркибдан Кейн, Алли, Эриксон ва Сон Хён Мин майдонга тушмаса ёки туша олмаса, ким гол уради? Улар ҳам одам ва ҳозирги темпга (Чемпионлар Лигаси ўйинлари эса икки хисса кўпроқ куч талаб қилади) дош бера олмаслиги мумкин.

“Челси” = 4 ўрин, 53 очко (1 ўриндан — 19 очко, 3 ўриндан — 1 очко орқада)

Нега кучли тўртликка киради?
“Челси” йўқотилган очколари бўйича “Тоттенхем”дан юқорида. Куни кеча, улар “Вест Бромвич” билан тўқнашувда ишончли ғалаба эришганидан хабарингиз бор. Аммо, “Борнмут” ва “Уотфорд” билан бўлган баҳсларда мағлубиятга учраган эди. Лондонликлар топ-4да финишгача боришлари учун бор иқтидорларини кўрсатишлари керак. Сабаби, Антонио жамоага бўлган таъсирини буткул йўқотгандек тасаввур пайдо бўлмоқда. Мураббий хаёлан янги иш жойини танлаш билан овворадек. Футболчилар ҳам буни тушуниб улгурган ва буёғига “Челси” обрўси, ўз обрўлари учун тер тўкишлари зарру. Ана ўшанда қўйилган мақсадга етилади, ана ўшанда қанчалик кучли бўлмасин “Барcелона” уларни Чемпионлар Лигасидан чиқариб юбора олмайди. “Кўк”ларга нафақат тажриба қўл келади, балки жамоани “уйғотиш” учун 2015/16 йилги мавсумда 10-ўринни эгаллаганликларини ҳам эслатиб қўйиш зарур шекилли. Нима бўлган тақдирда ҳам ўйинчилар ҳеч бўлмаса, ўз келажаги ва Чемпионлар Лигаси янги мавсумидан четда қолмаслик майдонга тушиши керак. Замонавий футболда эса Чемпионлар Лигасидаги иштирок яхшигина “мотиватор” ролини бажариб беради. Кўрамиз, “аристократлар” мавсумни қандай якунлашаркин?

Нега кучли тўртликка кира олмайди?
Тобора бош мураббий Антонио Конте ёғда жамоани тарк этиши ойдинлашиб бормоқда, ҳозир мухлислар ва раҳбариятнинг бор умиди ўйинчилардан. Аммо мураббийлар штабининг тактик масалалар бўйича изчил ҳаракатларсиз “Челси” тузоққа тушиб колиши мумкин. “Челси” ўртамиёна жамоаларга қарши ўйинлардаги мағлубиятлардан сўнг, асосий рақибларидан ортда қола бошлади. Мавсум сўнггида лондонликлар “Тоттенхем” ва “Ливерпул”га қарши ўйнайди. Жамоанинг ва ўша рақибларнинг ҳозирги кундаги аҳволини ҳисобга оладиган бўлсак, бу ўйинлардаги ғалаба ва чемпионатда кучли тўртликдан жой олиш жуда қийин масаладек...

“Ливерпуль” = 3 ўрин, 54 очко (1 ўриндан — 18 очко орқада, 5 ўриндан — 2 очко юқорида)

Нега кучли тўртликка киради?
“Ливерпуль” “қанча ёмон бўлса — шунча яхши” шиорига таяниб иш кўради. Ливерпуллик Робин Гудлар “бойлар”дан очко олиб, “камбағаллар”га улашишдан чарчамайди. Бугунги куннинг энг кучлиларидан бири бўлган “Манчестер Сити”ни мағлуб этган жамоа кейин “Суонси”га имкониятни бой берди, етмаганига Англия Кубогида “Вест Бромвич”ни ҳам “ўзбекона лутф” билан кейинги босқичга ўтказиб юборди.

Аммо “Ливерпуль” ҳужумдаги сермаҳсуллигини ҳеч ким ва ҳеч нарса яшира олмайди. Коутиньонинг жамоани тарк этганини ҳам ҳеч ким эслаб ўтирмаяпти. Сабаби Салах, Фирмино, Мане ва бошқалар бунга имкон қолдиришмаяпти. Бу мавсумдаги асосий ўйинчи шубҳасиз — Салах. Куни-кеча жамоа Португалияда “Порту”ни хафа қилди ва кейинги босқич томон дадил қадам ташлади. Демак ўйинлар зичлиги давом этади. Ҳозирда кўп нарса “қизиллар” баҳорга қанчалик яхши тайёргарлик билан ўтишларига боғлиқ. Шу сабабли, АПЛ етакчилари пойгасининг сўнгги фазаси жуда қизиқ бўлади.

Нега кучли тўртликка кира олмайди?
Агар “Ливерпуль”нинг ҳужумкор ўйинчилари ўзларининг вазифаларини аъло даражада бажарсалар ҳам Ван Дейк сотиб олинганига қарамай, баъзан ҳимоя панд бермоқда. Топ-6таликда “қизиллар”дан ёмонроқ клуб  фақатгина “Арсенал”. Клопп жамоасининг ўйини анчагина жисмоний куч талаб қилади. Шундай экан, мавсум сўнггидаги ўйинлар ва жароҳатлар сифатга ўз таъсирини кўрсатиши мумкин. Бўшашишга ҳали эрта, лекин таваккал қилиш керак. Хаёлан “Порту”ни ортда қолдирган Клопп шогирдлари бош соврин ҳақида орзу қилишни бошлаб юборган бўлсалар не ажаб. Бу эса ўз ўрнида АПЛ ўйинларига бўлган эътиборни етарли бўлмаслигига олиб келиши мумкин.

“Манчестер Юнайтед” = 2 ўрин, 56 очко (1 ўриндан — 16 очко орқада, 5 ўриндан — 4 очко олдинда)

Нега кучли тўртликка киради?
Моуриньо якка ўйинларда хато қилиши мумкин, бироқ бундай жиддий ўйинларда бунга асло йўл қўймайди. Бир йил аввал МЮ Чемпионлар Лигасидан четда қолганди. Жозе бу сафар Европа Лигасида ғалаба қозониб, бунга ечим топди. Ҳозир ички чемпионат орқали клублар ўртасидаги энг нуфузли мусобақага йўлланмани қўлга кириш имконияти бор. Агар Моуриньо шогирдлари охирги икки ҳафта ичида “Тоттенхэм” ва “Ньюкасл” билан ўтган баҳсларда мағлубиятга учрамаганида, МЮнинг ҳозирги ҳолати анча яхшиланган бўларди. Бироқ, Моуриньо ниманидир қурбон  қилиш керак бўлса ҳам, ўз мақсадига эришишга ўрганган.

Нега кучли тўртликка кира олмайди?
“Манчестер Юнайтед” ҳозир ўзига қулай вазият яратиб олган. Лекин, манкунианликлар буёғига бўшашмасликлари зарур. Моуриньо ўз услубига содиқ қолиб, ўз шогирдларидан бир “омадли”сини барчасида айбдор қилишда давом этаяпти. Омадсиз ўйинлар, кутилмаган натижалар МЮ да ҳам учраб турибди. Бугунги кунга келиб, фақатгина “Манчестер Сити” чемпионатдаги ўрни ҳақида қайғурмай, бор кучини ЕЧЛга сарфлаши мумкин.

“Манчестер Сити” = 1 ўрин, 72 очко (2-ўриндаги жамоани 16, 5-поғонадаги клубни 20 очкога ортда қолдирмоқда)

Нега кучли тўртликка киради?
Агар осмон ерга қулаб тушмаса, “Манчестер Сити” баҳорда албатта Англия чемпионатининг ғолиби бўлади.

Нега кучли тўртликка кира олмайди?
Фикримизча, тўртликка кира олмаслигига ҳеч қандай асос йўқ. Топ-4 қаторида бўлмаслиги учун нимадир юз бериши ҳақида ўйлашнинг ўзи ғалати...

Мавсум сўнгида АПЛда кучли тўртлик таҳминий кўриниши:
1. “Манчестер Сити”. 2. “Манчестер Юнайтед”. 3. “Ливерпуль”. 4. “Тоттенхэм”.

“Манчестер Сити” позициясига ҳеч нарсага таҳдид қилаётгани йўқ. МЮ ва “Ливерпуль” эса ўз ўрнини сақлаб қола олиш учун эса кучи етади. Эҳтимол, турнир жадвалидаги ўринларини алмашиб олишар. Вазиятга эътибор берадиган бўлсак, кураш кучли тўртликка кириш учун бўлишини таҳмин қилишимиз мумкин. Бироқ “Арсенал” бу баҳсда иштирок этмайди чоғи. Ҳақиқий кураш “Тоттенхэм” ва “Челси” ўртасида бўлса керак.

Сиз нима деб ўйлайсиз?


Нозима Зарипова