Буюк Хитой деворини қўриқлаётган мусулмон сарбозлар

Учрашув давомида "оқ бўрилар" устунликка эга бўлди, бироқ лақаби "Насаф"ники билан қариндош бўлган Чин мамлакати вакиллари ўзбекистонликлар учун виза сиёсатини бекор қилган бўлса-да, икки соатдан ошиқроқ вақт мобайнида уларнинг оёғи теккан тўпни етти метрли божхонасидан ўтишига йўл қўймади. 

Тўғри, мусобақанинг катта аҳамиятга эга эмаслиги ва мураббийнинг ўтмишда кўп нарсани исботлаганини инобатга олиб, асабимизни илм-фанга, масалан, беда прес нархи учун бузишга сарфласак ҳам ҳеч ким дод-вой қилмайди.

Шунга қарамай, Корея билан ўйинни инобатга олмаганда, захира ўриндиғини фақатгина меҳмон келгандагина фойдаланиладиган чинни идишлар сингари асраган мутахассисга саволлар етарлича топилади.

Ўзбекистон ўйин давомида катта устунликка эга бўлди. Келинг, шу факторни инобатга олган ҳолда, хитойликлар ҳақида гаплашамиз.

Исм-фамилиясини талаффуз қилишда шифокор рецептига қарагандек тасаввур ҳосил бўладиган хитойликлар таркибида сўнгги йилларда ўзимизга яқинроқ номларни ҳам ўқий бошладик. Жумладан, уйғур миллатига мансуб Умиджон Юсуф, Муталиб Имонқори, Баҳром Абдували сингари ёшлар Олимпия терма жамоаси сафида куни кеча этник жиҳатдан яқинроқ бўлган қардошларига қарши саф тортишди. Ҳа, мен қўққисдан ҳассаси билан ҳужум қилиши мумкин бўлган гўри нурга тўлгур бобомнинг сиёсатга қарши чиқмаслик фикрини инкор этмоқчи эмасман, номларни факт ўрнида келтирдим.

2024 йил якунларига кўра, аҳолисининг катта қисмини уйғурлар ташкил этадиган Шинжон провенциясидан Хитойнинг турли ёшдаги терма жамоаларига 15 нафар футболчи жалб этилган, Хитой Суперлигасининг 11 жамоасида эса 25 нафар қардошимиз тўп тепган.

Жумладан, кеча асосий таркибда кўриниш берганлардан – Баҳром Абдували миллий терма жамоаси сафида 9 ўйинда майдонга тушиб, Таиланд ва Индонезияга қарши беллашувларда ўз номини таблога ёздиришга муваффақ бўлган. У 2023 йил Хитой томонидан "Gоlden Boy" соврини учун номзод сифатида кўрсатилган.

Қизиқ жиҳати, Баҳром Абдували, Муталиб Имонқори 2023 йил Тошкентда ўтказилган U-20 Осиё кубогида иштирок этган. Ўша таркибда Афрден Асқар жамоа сардори бўлган, шунингдек, Мавлон Мажид, Абдулла Одил, Шерзод Нур каби ёшлар жамоа ўзагини ташкил этган.

Дунёдаги ҳар қандай маҳсулотнинг арзон вариантини ақл ила кашф этаётган хитойликлар яшил майдонда ҳисоб-китобларнинг ўзи камлик қилишини англаб етди ва мамлакат аҳолиси ҳисобланган туғма паҳлавон, қони қайноқ туркий қавмларни интеграция қилиш йўлидан бормоқда. Умуман олганда, келажакдаги Хитой терма жамоаси асосини уйғур йигитлари ташкил этса, ажабланмайман.

Оқил Абдубарноев