"Бухоро" Шавкат Муллажонов ва Шавкат Саломов билан шартнома имзолади

Яқинда жамоа йиғинига мамлакатимизнинг таниқли футболчилари Шавкат Муллажонов ва Шавкат Саломов келиб қўшилган эди. Куни-кеча ушбу тажрибали ўйинчилар билан клуб ўртасида расмий келишувга эришилди ва томонлар ўзаро шартнома имзолади. Шу тариқа Муллажонов ва Саломов жорий мавсумни "Бухоро"да ўтказадиган бўлди.

Ўтган мавсум "Бухоро" сафида сермаҳсуллик кўрсатиб, хатто миллий терма жамоадан ҳам таклиф ола бошлаган ҳужумчи Иван Нагаев айни дамда жамоа машғулотларида иштирок этмоқда. Аммо, Нагаев яқин орада жамоа билан хайрлашиб, хориж клубига кўчиб ўтади. Боиси, 28 ёшли ҳужумчига Қозоғистон ва араб давлати жамоаларидан жиддий қизиқиш бўлмоқда. Унинг қайси жамоага ўтиши ҳақида кейинроқ аниқ маълумот берамиз. Тошкентдаги йиғин чоғида мураббийлар яна айрим футболчилар билан ҳам дўстона равишда хайрлашиши кутилмоқда. Уларнинг кимлиги синов-назорат учрашувларидан сўнг аниқ бўлади. Эслатиб ўтамиз, "Бухоро" 13 январь куни "Машъал"га қарши ўртоқлик ўйинида майдонга тушади.

"Бухоро" матбуот хизмати