"Бунёдкор" клуби Юрий Саркисянни юбилей билан табриклади (ФОТО)
30 мая 2017 17:11
Новости
![](https://championat.asia/upload/storage/256673_original.jpg)
![](/upload/storage/256673_220.jpg)
"Бунёдкор" клуби Юрий Саркисянни юбилей билан табриклади (ФОТО)
Юрий Вазгенович 1947 йилнинг 30 май куни Арманистонда таваллуд топган. 1970 йилда Термиз шаҳридаги "Автомобилист" жамоаси сафида кўзга кўринди. 1975 йилда Фарғонанинг "Нефтяник" клуби сафига бориб қўшилган. 1978 йилда бир мавсум давомида "Шаҳрихончи" клуби шарафини ҳимоя қилган. Сўнгра яна Фарғонага қайтиб фаолиятининг охиригача шу ерда ўйнаган. 1982 йилда Юрий Саркисян профессионал футболдаги фаолиятини тугатган эди.
1985 йилда Москвадаги мураббийлар тайёрлаш Олий мактабини якунлади ва олий тоифали мураббий дипломини қўлга киритди.
У дастлаб мураббий, кейинроқ катта мураббий, сўнгра "Нефтяник"нинг бош мураббийига айланди. 1987-1989 йилларда жамоа унинг қўл остида Собиқ Иттифоқ чемпионатининг иккинчи лигаси 7-зонасида чемпионликка эришиб келди. Клуб биринчи лигага йўлланма олиб дебют мавсумдаёқ 7-ўринни банд этди.
1990 йилда Ўзбекистонда хизмат кўрсатган мураббий бўлди.
Ўзбекистон мустақил бўлгач жамоа номи "Нефтчи" деб ўзгартирилди ва ўзбек футболи байроқдорига айланди. Ўзбекистон чемпионатнинг дастлабки тўрт мавсумида "Нефтчи" олий лигани фақат биринчи ўринда тугатган. 2001 йилда ҳам Фарғона клуби Саркисян қўл остида Ўзбекистонда тенгсиз бўлган.
Юрий Саркисян 27 йил давомида (1987-2013 йилларда) "Нефтчи"да узлуксиз равишда бош мураббий бўлиб ишлаб келди. Жамоа унинг қўл остида жами беш марта Ўзбекистон чемпиони, икки марта Ўзбекистон кубоги соҳиби, 9 марта Ўзбекистон вице-чемпиони бўлган.
2014 йилдан буён "Бунёдкор" клубида маслаҳатчи мураббий сифатида ишлаб келмоқда. Юрий Саркисян Ўзбекистонда беш марта йилнинг энг яхши мураббийи деб топилган.
Ўзбекистон футболи ривожига қўшган хиссаси учун Юрий Саркисян "Дўстлик" (1997 йил) ва "Меҳнат шуҳрати" (2007 йил) ордени каби давлат мукофотлари билан тақдирланган.
Бугун "Бунёдкор" стадионининг анжуманлар залида Юрий Саркисяннинг 70 ёшлик юбилейига бағишланган тадбир бўлиб ўтди.
Унда Ўзбекистон Республикаси Жисмоний тарбия ва спорт давлат қўмитаси раиси Рустам Қурбанов, “Бунёдкор” клуби бош директори Мурод Алиев, “Бунёдкор” стадиони директори Воҳид Закиров ва “Бунёдкор” клуби ходимлари иштирок этишди ҳамда фахрий мураббий Юрий Саркисянни таваллуд айёми билан тантанали равишда қутлашди.
Анжуманни таниқли шарҳловчи, устоз журналист Мирзаҳаким Тўхтамирзаев олиб борди.
Дастлаб сўзга Ўзбекистон Республикаси Жисмоний тарбия ва спорт давлат қўмитаси раиси Рустам Қурбанов чиқди.
- Юрий Вазгенович Саркисян ҳақида ортиқча гапириб ўтиришга ҳожат йўқ. Кеча мен Термиздан кураш мусобақасидан қайтиб келдим. У ерда вилоят ҳокими Эркин Турдиев Юрий Саркисян ҳақида эслади ва мураббийни бизга қайтариб юборинглар, деб қолди. Юрий Вазгенович айнан Сурхондарёда футболдаги илк қадамини ("Автомобилчи") қўйганини ёдга олди ва жамоамизни яна Олий лигага қайтаришини сўради. Бу билан нима демоқчиман? Юрий Вазгенович қаерда ишлаган бўлса, ўша ерда ўзидан ажойиб хотиралар қолдиради ва бу ажойиб инсонни барча бирдек севиб эслайди. Мен Фарғона ҳақида гапирмадим ҳали. Бу алоҳида мавзу. "Нефтчи" дейилганда автоматик тарзда барчанинг ҳаёлига Саркисян келади.
Юрий Вазгенович бутун ҳаёти ва соғлигини "Нефтчи"га баҳшида этган фидоий инсон. Юрий Вазгенович нафақат "Нефтчи"да, балки "Бунёдкор"да ҳам катта меҳнат қилмоқда. Бу инсон қаерда ишламасин, ўз ишига чин юракдан, сидқидилдан ёндошади.
Юрий Саркисян бу аввало футбол рамзи. Футболга бўлган муҳаббатни айнан Юрий Саркисяндан ўрганмоқ лозим.
Юрий Саркисян бу футболга бўлган содиқликнинг энг олий намоёндаси, десам муболаға бўлмайди.
Барчамиз бу инсондан ўз ишига бўлган содиқлик, фидоийлик ва ўз ишини чин юракдан бажаришини ўрганишимиз, ўрнак олишимиз зарур. Биз ҳаммамиз қаерда ишламайлик, эрталаб соат 9да ишга келамиз ва 18:00га қадар ўз ишимизни бажариб, уйга қайтамиз. Келамиз, ишлаймиз ва маошни оламиз. Бунга одатланганмиз.
Лекин бу одам ўз ишига бутун умрини, соғлигини берган инсон. Буни ҳамма ҳам уддалай олмайди. Юрий Саркисян нафақат кучли ва истидорли футболчиларни тарбиялаган, балки у энг аввало улардан шахс кашф этган. Юрий Вазгеновичнинг жуда кўплаб шогирдлари бор. Масалан мен эрталаб Юрий Вазгеновичга табрикламоқчи бўлиб қўнғироқ қилдим ва уч марта ҳам туша олмадим. Чунки телефон банд эди. (Шу пайт анжуманда ростан ҳам Юрий Вазгенович Саркисяннинг телефони жиринглаб қолди) Мана сўзимга исбот. Юрий Вазгенович, илтимос, телефонингизни овозсиз режимга қўйинг.
Юрий Саркисян: "Узр, менга бу телефонни кеча қизим совға қилди. Ҳали буни қандай овозсиз режимга қўйишни ҳам билмайман".
Рустам Қурбанов сўзида давом этаркан шундай деди:
- Телефон, телеграм, хатлар давлатдардан келаётган табриклар, латифалар билан тўлиб тошган. Биласиз, Юрий Вазгенович латифалар ишқибози ҳисобланади.
Мен бекорга ушбу тадбирга келганим йўқ. Биринчи навбатда мен бу инсонни жуда ҳурмат қиламан. Иккинчидан биз ҳаммамиз, аввало мен раҳбар сифатида бу инсондан барча одамларга бирдек муомалада бўлишни ўрганишимиз керак. Юрий Вазгенович "Бунёдкор"даги барчага бирдек муомалада бўлади. Академиядаги барча болаларми, мураббийларми ҳаммани кўнглини олади ва керакли маслаҳатларини аямайди.
Бекорга маслаҳатчи мураббий бўлиб ишламайди. Ҳақиқий маслаҳатчи.
Юрий Вазгенович, сизни яна бир маротаба чин юракдан табриклайман. Соғлик, бахт ва омад ёр бўлишини тилайман. Умриз узоқ бўлсин. 100 ёшлик юбилейингизни нишонлаётганингизда ҳам табриклаш насиб этсин.
"Бунёдкор" академияда таҳсил олаётган ёш футболчилар ҳозирги кунда терма жамоаларимизнинг ўзагини ташкил қилмоқда. Академия тарбияланувчилари билан биргаликда "Бунёдкор"нинг ғалабали одимларини қайтариш насиб этсин.
Мен ишонаманки, келажакда Ўзбекистон терма жамоасида асосий ролни айнан "Бунёдкор" академияси тарбияланувчилари ўйнашади.
Худо хоҳласа Жаҳон чемпионатида агар 2018 йилда бўлмаса, унда 2022 йилда аниқ ўйнаймиз. Мен бунга шахсан ишонаман. Буёғига "Бунёдкор"нинг "олтин дубллари" ҳам қайтади. Бунга ишонамиз. Келажакда "Бунёдкор" жамоаси ОЧЛ бош совринини ҳам қўлга киритади.
Ижозатингиз билан Сизни Вазирлик номидан табриклайман!
Шундан сўнг сўз навбати "Бунёдкор" бош директори Мурод Алиевга берилди.
- Юрий Вазгенович, сиз шубҳасиғ буюк инсонсиз. Буюк мураббийсиз. Мени кечагидек эсимда, сизнинг қўл остингизда терма жамоада ўйнаганман. "Пахтакор"да ўйнаб юрган кезларимда ҳам "Нефтчи"га қарши ажойиб ўйинлар бўлганди. Сиз бошқарган "Нефтчи" кучли ва ажойиб жамоа бўлган. Ҳар доим таркибизда кучли футболчилар бўлган. Масалан, Бозоров, Дўрмонов, Лебедев, Фёдоров каби юқори савиядаги футболчилар бўлган. Айнан шу футболчилар терма жамоа шаънини муносиб ҳимоя қилишган. Улар билан Осиё ўйинларида ажойиб иштирок этгандик.
Шуни айтиб ўтишим керакки, сиз ўзбек футболи учун жуда кўп катта ишларни қилгансиз. Ўзбек футболи учун кўп меҳнатингиз синган.
Рустам ака жуда тўғри айтиб ўтдилар, сизнинг маслаҳатларингиз билан Миржалол Қосимов керакли хулосаларни чиқариши ва жамоани яна аввалги мавқеига қайтариши лозим. Бу борада ҳам сизнинг тажриба ва маслаҳатларингизга қулоқ соламиз. Кўп гапирмоқчи эмасман. Чунки бу ерда ўтирганларнинг жуда кўпчилиги сиз ҳақингизда гапирмоқчи. Шуни қайд этмоқчиман, шахсан менга сиз билан биргаликда ишлаш жуда ёқимли. Бундан бениҳоят хурсандман.
Сизга соғлик, бахт ва омад тилайман. Доимо шундай навқирон ва шижоатга бой бўлиб юринг. Бутун клуб номидан сизни туғилган кунингиз билан табриклайман.
Мурод Алиев Юрий Вазгенович Саркисянга тўн кийдирди.
Юбиляр тўнни кийгач бир латифани ёдга олди.
Саркисян: "Мени 60 ёшлик юбилейимда 20га яқин тўн кийдиришганди. Мен буларни олдимда, ўзбек маъмуримга совға қилдим. Менга буларни нима кераги бор, яхшиси сен олақол. Тўйларда қариндошларинг ёки танишларинга совға қиласан дедим. Кейин уч кундан сўнг Эмиратдан бир меҳмон келди. Шунда мен маъмуримга қараб, ўша кунги тўнлардан биттасини олиб кел, меҳмонга совғага, дедим. У эса менга қараб, ҳаммасини сотиб юбордим, деса бўладими..." (залда кулгу)
"Бунёдкор" стадиони директори Воҳид Закиров:
- Яқин 1,5-2 йиллар ичида мен Юрий Вазгеновичдан жуда кўп латифалар эшитдим. 2 йил олдин мен сиз билан танишганимдан сўнг ўзим учун ажойиб инсонни кашф этдим. Сиз нафақат латифалар айтиб берасиз, балки ўша латифаларни керакли жойда ишлатасиз ҳам. Чунки барча латифаларнинг тагига маъно ётади. Сиз ажойиб инсон, яхши маслаҳатгуй ака. Сизни бутун "Бунёдкор" стадиони маъмурияти номидан муборакбод этамиз. Сизга бақувват соғлик, тинчлик-тотувлик тилаймиз. Ҳеч қачон сиздаги қувват, жўшқинлик тарк этмасин. Мана ҳозир Рустам Қурбанов эслаб ўтдилар, сизни Термизда эслашади, Фарғонада. Мурод Алиев ҳам футболчилик пайтидаги ёрқин хотираларни эслаб ўтди. Буларни эшитиш албатта жуда ёқимли. Сиз ҳақингизда кўпчилик соатлаб гапириши мумкин. Бунга вақт етмайди. Кичик Саркисян сизнинг ишингизни, анъанангизни давом эттирсин. Сиздаги инсонийлик фактори қандай бўлган бўлса, ҳозир ҳам шундай. Сиз барчага бирдек муомаладасиз. Доим шундай қувноқ ва кучга тўла бўлиб юринг.
Ўзбекистон чемпионатининг 5 карра чемпиони, Ўзбекистоннинг 5 карра энг яхши мураббийи, "Нефтчи"даги 27 йиллик фаолияти билан содиқлик намоёндасига айланган буюк инсон, бугун ўзининг 70 ёшлик юбилейини нишонлаётган Юрий Вазгенович Саркисян сўзга чиқди ва анжуман иштирокчиларига ўз миннатдорчилигини билдирди.
- Мен кўп гапирмайман. Чунки кўп гапирганимда сўкиб юбораман (кулади). Мен тақдиримдан миннатдорман. Ўзбекистонда яшаётганимдан, шундай иноқ ва аҳил инсонлар билан бирга эканлигимдан жуда хурсандман. Буни ҳар доим таъкидлаб келаман. Мен 20 ёшлигимда Еревандан кетганман ва Ўзбекистонга келганман. Ўзбекистонга келиб футбол ўйнашни бошладим. 1982 йилга қадар футбол ўйнадим ва кейин бутсамни михга илдим. Кейин мени мураббий ёрдамчиси қилиб жамоага олиб қолишди. Кейин мени Москвага ўқишга жўнатишди. Ўшанда Ўзбекистон бўйича битта жой ажратилганди. 72 аризачилар ичидан менга ўқишга кириш насиб этди. Икки йил Москвада ўқиб қайтдим. Мураббийлик дипломини қўлга киритиб қайтгач, Фарғонанинг "Нефтчи" жамоасини қабул қилиб олдим. 1987 йилдан 2013 йилга қадар "Нефтчи"да ишладим.
Бу вақт оралиғида бир қатор ютуқларга эришдим. 9 марта олтин, 10та кумуш ва иккита бронза медалини қўлга киритдим.
Осиё чемпионлар лигасида 25 йил ичида фақат мени бошқарувимда "Нефтчи" медал ютишни уддалаган. Мен ўзимга-ўзим ҳеч қачон жамоага футболчи сотиб олмайман, деб сўз бергандим. Доимо ёш иқтидорларга, қишлоқдаги болакайларга эътибор қаратардим.
Мени ўзбек халқи тарбиялаган. Ўзбек халқи мени ҳаётдаги йўлимни кўрсатган. Фарзандларим ҳам Ўзбекистонда туғилишган. Мен "Нефтчи" билан 4 йил кетма-кет чемпион бўлганимдан кейин 1996 йили "Навбаҳор" олтин медалларга эга чиққанди. Ўшанда мен жуда қаттиқ ранжиганман. Кейин кетишни ўйлаб қолдим. Россияда ишламоқчи бўлиб тургандим. Мени амаким бўларди, ўшанда у менга кетмасликни маслаҳат берган. Кетма, сен шу ерда машҳур бўлдинг, шундай жамоани бошқаряпсан, деди. Лекин мен кетмоқчи эдим. Бу ерда ҳеч кимга керак эмасман, деб ўйлаб қолгандим. Лекин амаким, менга қулоқ сол, президент ҳамма нарсани билади, деди. Бир йил шошмагин деб маслаҳат берди. 1997 йили Ўзбекистон терма жамоаси билан Комбоджага кетгандим. Келишим билан уйимга ҳукуматдан телеграмма келди. Бундай очиб қарасам, қилган меҳнатлари учун, Ўзбекистон спорти ривожи йўлида қўшган ҳиссалари учун "Нефтчи" клуби ҳамда Ўзбекистон терма жамоаси бош мураббийи Юрий Саркисян "дўстлик" ордени билан тақдирлансин, деб ёзилган. Шундан кейин ҳеч қачон Ўзбекистондан кетмасликка ўзимга-ўзимга сўз берганман. Ва доим ўзбек ёшларига эътибор қаратиб, улардан келажакда яхши футболчи чиқиши учун меҳнат қиламан, деб ваъда бердим. Барчага катта раҳмат!
Яна бир бор ҳаммага раҳмат дейман ва миннатдорчилик билдираман.
Шу ўринда бир нарсани айтиб ўтмоқчиман, мен мусулмон одатлари бўйича яшайман. Буни барча билишини истардим, 2004 йили биз Саудия Арабистонида ўйнагандик. Мен ўшанда улар билан келишиб қўйгандим ва бутун жамоани Ҳаж сафарига юборгандим. Ўшанда мен уларга ўлганимдан кейин мени эслаб юрасизлар, дегандим.
Ҳозир Рамазон ойи. Тўғри тушунасизлар. Шу боисдан ҳам мен рўзадан кейин барчани банкетга таклиф этаман. Ҳавотир олманглар, ҳаммаси гаплашиб қўйилган (залда кулгу).
Тадбир самимий руҳда, ажойиб муҳит остида ўтди.
Юрий Вазгенович, туғилган кунингиз муборак бўлсин!
ФОТОГАЛЕРЕЯ. Юрий Саркисян 70 ёшга тўлди
Тадбир видео шарҳи
TAS-IX
TAS-IX эмас
Фото: Нарзулла Сайдуллаев
Шаҳбоз Беғамов тайёрлади
Похожие новости
![AMP Logo](https://championat.asia/image/logo-amp.png)
Комментарии