Бугунги кун модаси: "Чапақайлар"

Бунга сабаб чап оёқда ҳаракат қилувчи Месси, Роббен ёки Бэйл каби жаҳон футболи юлдузларини кашф қилишими? Футбол ишқибози ҳисобланувчи биз ва сиз ҳар куни футбол кўришни канда қилмаймиз ва бундан чарчамаймиз. Телевизор орқали кўрган учрашувларимизда бизни кўпроқ чапақайлар ажаблантиради, шундайми? Хатто ўзимизнинг клублар ҳам асосий эътиборни чап оёқда тўп тепадиган футболчиларга қаратмоқда. Демак, чап оёғига ишонадиган футболчиларга талаб катта ва улар модада! Бу мақоламизда бугунда машҳур бўлиб турган ва келажакда порлаши кутилаётган чапақайлар ҳақида сўз юритамиз.

Лионель Месси ("Барселона")

Бу футболчи ҳақида ортиқча гапириб ўтиришнинг кераги йўқ, чунки деярли ҳар куни Месси ҳақида ёзлади ва унинг ўйинидан парчалар кўрсатилади. "Барселона" вакиллари унга "совчи" бўлганида, Леонинг бу қадар юқори чўққиларга эришишини ҳеч ким кутмаган бўлса ажаб эмас. Роналдуни кексайишига йўл қўймаётган бу футболчини чапақайлар сардори десак бўлади.

Арьен Роббен ("Бавария")

Чап оёқда тўп тепишда Мессидан қолишмайдиган 31 ёшли Роббен ҳозиргача "Бавария"нинг асосий таркиб футболчиси ҳисобланади. Унинг кутилмаган бурилишлари ва ракетадек тезлиги ҳар қандай ҳимояни саросимага солиб қўя олади. Ракетадек деганимга ҳайрон бўляпсизми? Эсингиздами, Бразилияда ўтган жаҳон чемпионатида Рамосдан икки-уч метр ортда қолаётган Роббен, бир неча сониядан сўнг Серхиони "чангида" қолдириб кетади ва Касильяс дарвозасини аниқ нишонга олади.

 "Бавария"нинг Роббен-Рибери жуфтлиги ҳужумга ўтганида, фақат мўжиза бу ҳужумни голдан сақлаб қолиши мумкиндек таасурот уйғонади.

Гарет Бэйл ("Реал")

Аввалига "Тоттенхэм" ҳимоячиси бўлган Гарет Бэйл ҳозирги кунда "Реал"нинг ҳужум чизиғида тўп тепади. "Интер"га қарши ўйинда "шпорлар" сафида ҳаракат қилган Бэйл ўша пайтдаги энг кучли ҳимоячилардан бири саналадиган Майкондан бемалол қочиб, рақиб дарвозасини нишонга олишдан чарчамаган. Гаретнинг айнан шу "очилиб кетиши" унга "Реал"га ўтишга катта ёрдам берган. Айни дамда у "Қироллик клуби"нинг асосий таркиб футболчиси ҳисобланади.  Бэйлнинг голлари туфайли Евро-2016 саралашида қатнашаётган Уэльс терма жамоасини гуруҳда биринчи ўринга олиб чиқди.

Анхель ди Мария ("Манчестер Юнайтед")

"Реал"да ўз ўйинининг юқори савиясини намойиш этган Анхель ди Мария ҳозирда "Манчестер Юнайтед" сафида ўз даражасида ўйнай олмаяпти. Балки унга инглиз футболига кўникиш қийинчилик туғдираётгандир? Аммо ўтган мавсумда ди Мария "Реал" Чемпионлар лигасида ғолиб бўлиши учун кўп меҳнат қилган. Анхель Чемпионлар лигаси финал учрашувининг энг яхши футболчиси деб топилган. Ди Мария "Қизил иблислар" сафида яна ўз ўйинини топиб олади деган умиддамиз.

Марсело ("Реал")

Ҳозирги кунда "Реал" чап қанот ҳимоячиси ролида Марселодан бошқасини тасаввур қила олмасак керак. Тўғри, Коэнтрау ҳам кучли футболчи, аммо Марсело тажрибали ва иродалироқ. У "Қироллик клуби" ҳужумларининг деярли ярмидан кўпида иштирок этади. Қанот ҳимоячисининг чап қанотдан ёриб кириб, худди Азар каби ўнг оёғи билан дарвозанинг узоқ бурчагини нишонга олганини бир неча марта кўрганмиз. Дунёнинг барча мураббийлари бундай футболчини ўз жамоасида кўришни хоҳлайди.

Аллен Халилович ("Барселона")

"Барселона" келажаги ҳисобланаётган Аллен Халилович ҳозирда "Барселона" B жамоасида тўп тепяпти. У илк профессионал шартномасига 16 ёшида имзо чеккан. Аллен 2 йил давомида Загребнинг "Динамо" клуби таркибида 44 марта майдонга тушиб, 7та голга муаллифлик қилган. Иқтидорли футболчини узоқ муддат кузатган Каталония клуби, 2014 йилда Халиловични харид қилди. 18 ёшли футболчи Хорватиянинг деярли барча ёш тоифасидаги терма жамоаларида тўп тепган. Бу ёш иқтидор эгаси, 1996 йилда туғилган бўлишига қарамай, ҳозиргача Хорватия терма жамоасининг 7та учрашувида майдонга тушиб улгурган.

Мартин Эдегор ("Реал")

Бу футболчи ҳақида жуда кўп ёзишди. Мартин 15 ёшида Норвегия чемпионатида иштирок этувчи "Стрёмсгодсет" сафида 23 марта майдонга тушиб, 5та голга муаллифлик қилди. 1998 йилда таваллуд топган футболчи Норвегия терма жамоаси сафида 4та ўйинда иштирок этди. "Реал" ҳам ўз келажагини "Барселона" каби чапақайга ишонишни мақсад қилди. Эдегор 16 ёшли футболчилар орасида энг кўп маош оладиган футболчига айланган. Ахир бу "Қироллик клуби"-ку!

Жамшид Искандеров ("Пахтакор")

Жамшид Искандеровга ўзбек футболининг келажаги сифатида қаралмоқда. У тепада номлари келтирилган футболчилар каби Европанинг гранд жамоаларида ўйнай олади. Искандеров "Пахтакор"нинг асосий ижодкори ҳисобланади. Анчадан бери "бизнинг футбол - зерикарли" деб юрган юртдошларимиз, бугунги кунда бу футболчи туфайли ўз фикрини ўзгартирган бўлса ажаб эмас. Тана тузилиши унча катта бўлмаган Жамшидда кучли зарба борлигини кўпчилик унинг жарима зарбалари орқали билади. "Пахтакор" ярим ҳимоячиси келажакда "Барселона", "Реал", "Бавария" каби клубларда тўп тепишига умид қиламиз.

Сардор Рашидов ("Бунёдкор")

Ўзбек футболи ишқибозлари Сардор Рашидовни Криштиану Роналдуга таққослашдан чарчашмаяпти. Улар тўғри қилади, чунки Сардорда Роналдудаги тезкорлик, кучли зарба, ажойиб дриблинг бор. Унинг ҳаракатлари туфайли стадионларга мухлислар қайтмоқда. Камина, Рашидовнинг ўйинларини катта эътибор билан кузатаман ва ҳозиргача Сардорнинг чап оёғи билан амалга оширган бирор жарима тўпини рақиб дарвозабони бир уринишда ушлаб олганини эслай олмайман. Агар "Бунёдкор" ярим ҳимоячиси ўз устида ишлашда давом этса, албатта ўзи мақсад қилган юқори чўққиларга эришади. Сардор Рашидовнинг ўйини бир тарафдан "қалдирғочлар" мураббийи Сергей Лушанга ҳам боғлиқ, у тўғри тактика танлаб, истеъдодли ярим ҳимоячимиздан унумли фойаланади деган умиддамиз.