Бугун футбол. "Нефтчи" тўртта ўйинлик ғалабасиз серияга барҳам бера оладими?

Фарғоналиклар янги бош мураббий Вадим Абрамов бошчилигида бугун учинчи ўйинни ўтказишади. Аввалги икки ўйинда "Нефтчи" "Динамо"га имкониятни бой берган бўлса, "Машъал" билан дуранг қайд этди. 

Умуман олганда, "Нефтчи" охирги тўрт учрашувдан бери ғалаба қозона олмаяпти: икки дуранг, икки мағлубият. Жамоа бугун "Металлург"ни қабул қилади. Бекободликлар охирги пайтларда чакки эмас. Хусусан жамоа кетма-кет уч учрашувда ғалаба қозонди. "Металлург" "Насаф", "Обод" ва "Қизилқум" клубларини мағлуб этди. 

Олий лига турнир жадвалида 15-ўринда бораётган "Нефтчи" ҳозирча ўз майдонида фақат бир марта ғалабага эришган. Фарғоналиклар "Обод"ни 1:0 ҳисобида мағлуб этишган. Жамоа шунингдек, икки бор дуранг ўйнаб учта ўйинда ютқазиб қўйган. 

Бугун "Металлург" сафарда еттинчи баҳсини ўтказади. Аввалги ўйинларда бу жамоа фақат бир марта ғалаба қозонган. "Металлург" Тошкентда "Обод"ни мағлуб этган. "Металлург"нинг охирги беш учрашувдан фақат биттасида ютқазиб қўйганини инобатга олсак, жамоа ҳозир анча ўзига келиб олган ва бугун Фарғонада мезбонларга осон бўлмаслиги кутиляпти.