Бугун футбол. "Нефтчи" - "Пахтакор"

Бугун Фарғонада турнир жадвалининг охирги ҳамда биринчи ўринларида бораётган жамоалар ўзаро баҳс олиб боришади. "Пахтакор" 29 очко билан пешқадамлик қилаётган бўлса, "Нефтчи" атиги 5 очко тўплаган ҳолда охирги ўринни эгаллаб турибди. Очколар орасидаги фарқ 24та.

Бугунги ўйинда "Нефтчи"га фақат ўз майдонида ўйнашигина устунлик бериши мумкин. Ўйин томонлама эса "Пахтакор" анча кучли. "Нефтчи" ҳар ўйинда ўзининг дастлабки ғалабасини нишонлашга ҳаракат қилмоқда, бироқ ўтган 13та беллашувдан бери бу амалга ошгани йўқ.

Умуман олганда, Суперлигада ғалаба қозонмаган фақат бир жамоа қолган. Бу жамоа "Нефтчи" эканини мухлислар яхши билади. Фарғоналиклар уйда ўтказилган учрашувларнинг иккитасида дуранг ўйнаб, 5 марта имкониятни бой беришган. Тўплар нисбати 2-11.

Биласизми? "Нефтчи" охирги иккита ўйинни бир хил 0:2 ҳисобида бой берди. Жамоа сафарда "Насаф"дан, кейин ўз майдонида "Сўғдиёна"дан шу ҳисобда мағлубиятга учради.

Факт: "Нефтчи" охирги тўртта учрашувнинг биттасида дуранг ўйнаб, уч марта мағлуб бўлди.

"Пахтакор" ҳақида гапирадиган бўлсак, бу жамоанинг мақсади чемпионлик. "Шерлар" олий мақсад сари турма-тур ҳаракат қилишмоқда. Охирги учта турни ғалаба билан якунлаган "Пахтакор" бугун ҳам Фарғонада уч очко учун ўйнайди.

Биласизми? "Пахтакор" шу пайтгача сафарда олти бор майдонга тушган бўлса, шундан учтасида ғалабага эришган. Шота Арвеладзе шогирдлари "Металлург", "Насаф" ва "Сўғдиёна"дан устун келишган.

Факт: "Пахтакор" "Насаф" билан бирга Суперлига жамоалари орасида сафарда энг кам гол ўтказган жамоа бўлиб турибди: фақат тўртта гол.