Буффон Италия терма жамоасини танқид қилди: "Биз ўзлигимизни йўқотдик"

Испаниянинг "Mundo Deportivo" нашрига берган интервьюсида у "Скуадра Адзурра" ўзининг футбол фалсафасидан четга чиққани, унинг фикрича, бу футболчилар савиясига салбий таъсир кўрсатганини айтди.

"Италия терма жамоаси сўнгги 20 йил ичида шундай ҳолатга келиб қолганидан уялиши керак. Ҳамма Испанияга тақлид қилишимиз керак деб тинмай гапирарди. Якунда биз ўз услубимиз, ўз мактабимизни рад этдик. Биз Фабио Каннаваро каби футболчиларни тарбиялашни тўхтатдик. Ҳозирда уни майдонга туширишдан уялган бўлардик. Ҳатто Кьеллини ҳам бугунги – чизиқлар бўйлаб ўзаро паслашадиган жамоага тўғри келмасди", – деди Буффон.

Жанлуижи 1997 йилдан 2018 йилгача Италия терма жамоасида 176 ўйинда қатнашиб, рекорд ўрнатган. 47 ёшли афсона Италия футболи ва унинг анъаналари рамзи бўлиб қолмоқда.