Бразилия-Аргентина учрашувининг бошланиши стадиондаги тартибсизликлар туфайли кечикди

Ўйин Рио-де-Жанейрода бўлиб ўтмоқди.

Учрашув бошлангунга қадар “Маракана” трибуналаридан бирида можаро юзага келди.

Икки давлат мадҳиялари янграётган пайтда уй ва меҳмон мухлислари ажратилмаган бўлимда тўқнашув бошланди.

Полиция эса мухлисларга нисбатан кескин чора кўрди ва мухлисларга қарши таёқлардан фойдаланган. Трибунадаги аргентиналик мухлислар ҳуқуқ-тартибот идоралари вакиллари ва бразилиялик томошабинлар билан тўқнаш келишди. Полицияга турли хил нарсалар улоқтирилди.

Аргентина терма жамоаси футболчилари можарони бостириш мақсадида мухлислар секторига борди. Мезбонлар сардори Маркиньос ҳам томошабинларга яқинлашди. Аммо бу вазиятга унчалик таъсир қилмади ва мухлислар ва полиция ўртасидаги тўқнашув тахминан ўн беш дақиқа давом этди.

Меҳмонлар сардори Лионель Месси жамоадошларига жамоа майдонни тарк этиши кераклигини кўрсатди. Аргентина терма жамоаси трибуналар остидаги биноларга йўл олди.