"Босим жуда юқори экан". Қувондиқ Рўзиевнинг "Навбаҳор"га мослашиш жараёни қандай кетяпти?

- "Навбаҳор" шу вақтгача Тошкентда "Бунёдкор"ни мағлуб этмаган. Бугун бу анъанага чек қўйилиши мумкин эдими?

- Авваламбор, мухлисларга қўллаб-қувватлашгани учун раҳмат айтаман. Мазкур ноҳуш анънага чек қўйишимиз мумкин эди. "Бунёдкор" қисқа паслар билан ўйин назоратини қўлга олишини билардик. Рақибни қарши ҳужумда "ушлашни" режа қилгандик. Қайсидир маънода имкониятларимиз ҳам бўлди. Шунчаки, фойдалана олмадик. Бундай ўйинларда биттагина гол кўп нарсани ҳал қилиб юборади. Шуни айтишим керакки, ютқазишимиз ёки ютиб кетишимиз мумкин эди. Қийин вазиятларда дарвозабонимиз қутқарди. 

- Жамоада ҳужумни бошлаш зонасида камчиликлар кўзга ташланди. Битта пас билан ҳужум бошлайдиган футболчи етишмагандек бўлди...

- Нима десам бўлади, менимча ҳужумда вазиятлардан фойдаланиш коэффициенти бизда камроқ бўляпти. Ҳимоя ва ярим ҳимоя ўртасида жиддий муаммо йўқ. Аввалги учрашувларга қараганда аста-секин ўйинимиз ўсяпти. Жамоавий ўйин масаласида ҳаракатларимиз қовушмоқда.

- "Навбаҳор"га мослашиш жараёнингиз қандай кетяпти? Балки, кучли босим тўсқинлик қилаётгандир...

- Гапингизга юз фоиз қўшиламан. Босимга дош бера оламан, деб ўйлагандим. Бироқ босим бу ерда мен ўйлаганимдан ҳам кучлироқ экан. "Қўқон-1912"да ярим йил захирада ўтирганман. Жамоага секин мослашганман. "Навбаҳор"да ҳам шу нарса кўзга ташланяпти. Айрим вазиятларда футболчиларни, бевосита ёнимда бирга ўйнайдиган ярим ҳимоячиларни тўлиқ тушуниб олганимча йўқ. Таркибга назар солсангиз, фақат мен янги келганлардан ҳисобланаман. Ўн киши ўтган йили тўп тепган. Шу боис ўзаро тушуниб кетишга вақт керак бўляпти.