Биринчи лига қаерга қараб кетмоқда ёхуд “Ёзёвон-Лочинлари” ҳам сафарга 11 нафар футболчи билан жўнаб кетди

Бугун эса яна биринчи лиганинг бошқа бир жамоасидан шундай хабар келди. Энди бу сафар Фарғонанинг “Ёзёвон-Лочинлари”да муаммо юзага келган. Ўз номини сир тутиш таклифи билан бизга маълумотларни етказган шахснинг айтишича, жамоада моддий муаммолар юзага келганига анча вақт бўлган. Футболчилар деярли мавсум бошидан буён насияга ўйнаб келаётган экан. Ёзёвонликлар иккинчи босқичнинг навбатдаги турини, 20 сентябрь куни Нукусда “Орол”га қарши ўтказади. Мазкур бўлажак баҳсга футболчиларнинг бориши сўроқ остида бўлиб, раҳбарият сўнгги паллада сафарга бориб келишни имкон қадар таъминлаб берган. Шунда ҳам 11 нафар футболчи билан жўнаб кетилган. Уларни Нукусга олиб бориб келиш клуб маъмури гарданига юкланган. Демак, “Орол”га қарши кимларнинг ўйнаши аниқ. Мабода бирор-бир футболчи жарохатга йўлиқса, билмадик унинг ўрнини ким тўлдирар экан?!

Шунингдек сафарга бош мураббийсиз кетган клубдан ижобий натижа кутиш ҳам ноўрин бўлса керак. Яна билмадик.

Четдан қараганда, биринчи лига ўйинлари шунчаки расмиятчилик учун ўтказилаётгандек таассурот қолдирмоқда. Шу кунгача бирор-бир вилоятга ПФЛ вакилининг бориб, ўйинларни ташкил этиш ёки у ердаги вазият билан танишганини учратмадик. Кўп гувоҳ бўламиз айрим стадионлар талабга жавоб бермасада, учрашув ўтказиб келинмоқда. У ерда на табло бор, на стадион суҳандони учун карнайлар. Хаттоки ўйиндан олдин жамоалар майдонга чиқиб келаётганида ПФЛ мадҳияси ҳам қўйилмаяпти. Жазирама ёзнинг айни чилласида сунъий майдонда жавлон ураётган футболчиларга ачинасан киши.

Шундай пайтда ўйланиб қоласан киши – биринчи лига қаерга қараб кетмоқда.