Биринчи лига. Мавсумнинг энг яхши ёш ўйинчиси: Темур Толипов!

Буни қанчалик амалладик, муносиб баҳони ўқувчилар беришади. Лекин ҳар бир клуб расмийларидан бунинг учун алоҳида миннатдорчилик эшитиб келдик.

Ортда қолган мавсум-2014да биринчи лига учрашувларини сайтимизда ёритиб борилишида асосий ишни бажарган  4 нафар ходимимиз турли номинациялар бўйича энг яхшиларни аниқлади.

Хусусан жорий мавсум биринчи лига ўйинларида ҳар томонлама ўзини кўрсата олган “Энг яхши ёш ўйинчи” номинациясида Темур Толипов ғолиб чиқди. Биринчи босқичда “НБУ-Осиё” рўйхатидан ўтган 19 ёшли футболчи иккинчи босқичда “Пахтакор-2”га қайтди. 5-турда “Пахтакор-2” - “Ғаллакор-Автомобильчи”  ўйинини эсланг-а? Толипов мазкур учрашувда рақиб дарвозасига нақд 6та (!) тўп киритиб, ўзига хос шов-шув уйғотгани ҳалигача мухлислар ёдидан кўтарилмаган бўлса керак.

Мавсум мобайнида жами 11та гол киритган Темур ушбу номинацияда 15 балл тўплаб, қолган 4 нафар ўйинчини ортда қолдирди.  

Мавсумнинг энг яхши ёш ўйинчиси:
Темур Толипов (“Пахтакор-2”) - 15
Жамшид Ҳошимов (“Шўртан”) - 14
Шокир Юлдашев (“Машъал-2”) - 12
Достон Нуруллаев (“Зомин”) - 11
Салоҳиддин Салоҳиддинов (“УзДонгЖу”) - 8