Биласизми? “Локомотив” олий лиганинг фақат иккита ўйинида тўп кирита олмади

“Темирйўлчилар” мавсум бошидан то охиригача фақат чемпионлик учун кураш олиб боришди, бироқ айрим ўйинларда йўқотилган очколар чемпионликка етарли бўлмади.

Олий лигада 30та ўйин ўтказган “Локомотив” шундан 23тасида ғалаба қозонди, 5 бор дуранг ўйнаган бўлса, икки марта мағлубиятга учради. Жамоамиз сафарда “Насаф” ва “Пахтакор”га имкониятни бой берди, шунингдек, “Металлург” (икки марта), уйда “Нефтчи”, сафарда “Қўқон-1912″ ва “Олмалиқ” клублари билан дуранг ўйнади.

“Локомотив” олий лигадаги 30та ўйиннинг фақат иккитасидагина тўп кирита олмади. Жамоамиз аввалига “Металлург” билан 0:0 ҳисобида дуранг ўйнаган бўлса, кейинчалик “Насаф”га 0:1 ҳисобида имкониятни бой берди. Ҳар иккала учрашув ҳам сафарда ўтказилди. Умумий ҳисобда “Локомотив” бу йил 43та расмий беллашувда майдонга тушди. Мана шу ўйинларда “темирйўлчилар” жами 88та гол уриб, ўз дарвозаларидан 38 бор тўп ўтказиб юборишди. Бу эса тўплар нисбатига кўра +50ни ташкил этмоқда.