Бахтиёр Ашурматов: "Чемпионатимиз иккига бўлингандек!"

—   “Насаф” ўз майдонида чиройли ва ишончли ўйин намойиш қилишини билганлигим сабабли бугун ҳимоявий тактика танлашга мажбур эдим. Йигитлар охиригача курашди, уларга эътирозим йўқ. Бугунгидек ўйинлар чемпионатни безайди, деб айта оламан.

—   Бугун кўп бора футболчиларингиз ўйинни чўзишга ҳаракат қилишди. Ўзингиз шундай кўрсатма берганмидингиз?

—   Мен ҳеч қачон шогирдларимга ётволиб ўйинни чўзинглар, деб кўрсатма бермайман. Бугунги ҳаво дим, қолаверса футболчиларимиз “Насаф”нинг шиддатли ҳужумларига дош бера олишмади. Масалан, Азим Аҳмедовни оладиган бўлсак, у терма жамоадан толиқиб қайтганди, майдонда ўзини нохуш ҳис қилди.

—  Качурни бошланғич таркибда кўрмадик?

—  У “Нефтчи” билан учрашувда кичик жароҳат олганди.

—  Бугунги ҳакамлик ҳақида фикрингиз?

—   Мен “Нефтчи” билан ўйинда иккинчи бўлимни трибунада ўтказдим. Бу мен учун жуда оғир бўлди. Шу сабабли бугун ҳар қандай вазиятда ҳам ўзимни босишга ҳаракат қилдим. Мен ҳакамлар ҳақида ҳеч нарса демайман. Уларни назорат қилувчи ташкилот бор. Ҳакамларга худодан инсоф сўрайман. Агар ҳакамлар адолатли бўлишса, адолатли ҳакамлик ўзбек футболининг ўсишида асосий омил бўларди.

—  Ҳомийларнинг ёрдами тўғрисида фикрингиз?

—  Ҳомийимиз жамоага беминнат ёрдамини аямаяпти. 2012—13 йиллардаги жамоа қарзларидан тўла қутилдик. Уларга катта раҳмат айтмоқчиман. Қолаверса, футболчиларимизнинг жамоага нисбатан ишончи ортмоқда. Футболчилар билан шартномаларимиз шунчаки қоғозда қолиб кетаётгани йўқ.

—  Жамоа олдига қандай вазифа қўйилган?

—   Чемпионатимиз иккига бўлингандек, гўё! Дастлабки тўрт жамоа алоҳида чемпионат, қолган жамоалар эса бошқа бир чемпионатдек! 5—6 ўрин учун курашамиз. Энг муҳими жамоага фундамент қўйилмоқда. Агар мухлислар ва ҳомийимизнинг ишончини йўқотмасак, келгуси мавсумдан юқорироқ марраларни кўзлаймиз.

Олим ТОЛИПОВ ёзиб олди.