Бахтиёр Ашурматов: "Асосийси ғалабани қўлга киритиш эди"

- Бугун мавсумнинг энг қийин ва асабий ўйинларидан бирини ўтказдик. Афсуски сўнгги турларда, мағлубиятлар гирдобига тушиб қолгандик. Шу сабабли, “Андижон”га қарши ўйинни масъулияти ва босими катта эди. Бунга яна бир сабаб сифатида андижонликларни сўнгги учрашувларда муносиб тарзда тўп сураётганликларини ҳам кўрсатиш мумкин. Улар ҳар бир ўйинда охирги жангга чиққандек ҳаракат қилишмоқда.Бунга рақибнинг “Шўртан” ва “Локомотив”га қарши кечган ўйинлари ёзувини кўргач амин бўлдик. Ўша баҳсларда улар ёмон таассурот қолдиришмаганди. Бугунги ўйинда ҳавотирларимиз ўз истотини топди.Яъни “Андижон” жамоаси охирги сонияларгача ўзи учун керакли натижа учун курашди. Айнан шу сабабли, бугунги баҳс биз учун қийин бўлди. Мухлисларимиз эътирозларини тўғри тушуниш керак. Негаки улар ўйингоҳга дам олгани ва чиройли футбол томоша қилиш илинжида келишади. Бугунги ўйин учун ишқибозларимиздан узр сўраган бўлардим.Ҳозирги шароитда асосийси ғалаба қозониш ва уч очкони қўлга киритиш эди. Масалан “Бунёдкор” ёки “Пахтакор”га қарши жамоамиз яхши ўйин кўрсатди. Мухлисларимиз имкониятни бой берган бўлишимизга қарамай, жамоамиз аъзоларини олқишлар билан кузатиб қўйишганди. Афсуски ўша ўйинларда очко ола билмагандик. Бугун эса ўзимиз ва мухлислар хоҳлагандек ўйин кўрсатмаган бўлсакда, уч очкони қўлга киритишни уддасидан чиқдик. Айнан шу сабабли, ушбу баҳсда асосийси уч очкони қўлга киритиш ҳисобланарди.