"Барселона" ва "Реал" афсоналари Месси ўйнайдиган стадионда учрашади

Бу ҳақда Каталония клуби матбуот хизмати маълумот берди.

Икки Испания суперклубларининг афсоналари ўйини сўнгги йилларда анъанага айланди: улар 7 марта, жумладан, 2024 йилда 5 марта тўқнашди. Фахрийларнинг навбатдаги турнири сентябрь ойида АҚШда бўлиб ўтади. Жамоалар 9 ва 13 сентябрь кунлари Нью-Жерси штатининг Ҳаррисон ва Флорида штатининг Форт-Лодердейл шаҳарларида ўйин ўтказади.

Иккинчи ўйин 21 550 томошабинга мўлжалланган ва "Интер Майами"нинг уй аренаси бўлган "Чейз" стадионида ўтказилади. Бугунги кунда у ерда Лионель Месси, Серхио Бускетс, Луис Суарес, Жорди Альба каби "Барселона" собиқ футболчилари тўп тепади. Америка жамоасини бошқа бир собиқ каталониялик футболчи Хавьер Маскерано бошқаради.

Афсоналар учрашувлари учун тўлиқ таркиб яқин ҳафталарда эълон қилинади. "Барселона"да Ривалдо, Клаудио Браво ва Паулиньо ўйнаши аллақачон маълум.