Байрамингиз билан, азиз темирйўлчилар!

Темир йўллар гуёки республикамизнинг ўзига хос қон томирларига ўхшайди. Бу йўллар нафақат юртдошларимизнинг узоғини яқин, оғирини енгил қилишга хизмат қилмоқда, балки темир йўллар Ўзбекистонни жаҳон ҳамжамияти билан боғлашга, иқтисодимизни юксалтиришга ва энг муҳими, турли халқлар ва элатлар ўртасида дўстлик ришталарини мустаҳкамлашга ҳам хизмат қилаётир. Шу боис бу юртда темирйўлчиларни эъзозлашади, уларнинг меҳнатларини муносиб қадрлашади.

Ўзбекистонда бир неча йилдирки август ойининг илк якшанбаси темирйўлчиларнинг касб байрами сифатида кенг нишонланади. Бугун 4 август, мелодий 2013 йилнинг август ойи биринчи якшанбаси. Демак, юртимизда катта тўйу-тантана, шодиёна... Ўзини темирйўлчи, деб билган ҳар бир инсон борки, бу кунни ўзгача энтикиш, соғин билан қарши олади. Ахир меҳнатинг эъзозини кўриш кишига қанчалар ёқимли ҳисларни тақдим этишини таърифлашга хожат бўлмаса керак.

«Локомотив» профессионал футбол клуби ҳамда жамоа мухлислари «Ўзбекистон темир йўллари» ДАТК тизимида фаолият кўрсатаётган юртимиздаги барча инсонларни бугунги касб байрами билан самимий муборакбод этади. Ҳамиша яқинларингиз бахтига соғ-омон бўлинг. Шуни унутмангки, «Локомотив» футбол клуби ҳам ўз номига хос шиддат ила одимлаган ҳолда сизни ҳамиша хушнуд этишга астойдил ҳаракат қилади.

Байрамингиз билан, азиз темирйўлчилар!!!

«Локомотив» ПФК маъмурияти