Баҳром Ҳакимов: “Насаф” ғалаба қозониб, туғилган кунимга совға қилса хурсанд бўлардим”

ОЧЛ гуруҳ босқичидан ўрин олган мазкур ўйиндан олдин “аждарлар”нинг собиқ мураббийи Баҳром Ҳакимовни “безовта” қилдик. Буни қарангки, хурсандчилик устига қўнғироқ қилган эканмиз. Боиси Баҳром Мамажонович бугун ўзининг қутлуғ 60 ёшини қарши олмоқда. Мутахассисни табриклаган холда, бўлажак баҳс олдидан фикрларини билишга қизиқдик.

- “Яқинда Қаршига раҳматли Нуриддин ака Зайниевнинг фотихасига борганимда, “Насаф”дагилар билан ҳам учрашиб гаплашгандик. Шунда ОЧЛдаги биринчи ўйин осон бўлмаслигини айтгандим. Ўз мухлисларинг қаршисида илк учрашув катта босим остида ўтади. Чунки фақат ғалаба қозониш талаб этилади. Бугун “Насаф”дан албатта ғалаба кутяпман. Футболчилар ғалаба қозониб, туғилган кунимга совға қилишса хурсанд бўлардим (кулади)” – дея гап бошлади Ҳакимов.

- “Тракторсозий” ҳақида очиғи етарлича маълумотга эга эмасман. Лекин улар ҳам сафардан ижобий натижа билан қайтишга уринади. Бундан ташқари “Насаф”нинг ҳам бугунги кундаги ўйини ҳақида тасаввурга эга эмасман. Мавсумлар оралиғида 2-3та ўйинчи олганидан хабарим бор. Ҳужум чизиғини кучайтириш учун Олександр Коблашни олишди. Менимча бу яхши трансфер бўлди. Сабаби олдинги чизиқдаги рақобатни кучайтириш талаб этиларди. Хуллас шахсий фикримни айтадиган бўлсам, бугун “Насаф” битта тўп эвазига ғалаба қозонади.


Исломбек Рустамбеков