Азиз Ғаниев: "Финалда ўйинни тўхтатмоқчи бўлишган эди"

ОЧЛ гуруҳ босқичига йўлланма берувчи саралаш ўйини Қаршидаги "Марказий" стадионда ўтказилади.

Биз "Ал Файсали" клуби, учрашув ҳакамлари ва "Насаф"нинг U-23 Осиё чемпионатида чемпион бўлган 4 нафар футболчиси билан бирга Қаршига учдик. Ўз навбатида, бу фурсатдан фойдаланиб ўзига ҳос қаҳрамонларимиздан интервью олдик. Қуйида Азиз Ғаниев билан суҳбатни эътиборингизга ҳавола этамиз.

- Осиё чемпионатида Қатардан ташқари энг қийин ўйин қайси бўлди?
- Уммонга қарши ўйин бошқаларига қараганда қийинроқ бўлди. Уммон яхши жамоа экан, учрашувдан кейин йигитлар ҳам бироз қийналишганини айтишди.

- Равшан Ҳайдаровни асосий кучи нимада?
- Мураббийимиз ҳаммани йиғиб бирдамликни кучайтирдилар. Ҳар бир беллашувдан олдин йигитларни яхши тайёрлай олдилар.

- Ярим финалда Жанубий Корея дарвозасини узоқ масофадан нишонга олдингиз. Ўша гол ҳақида гапириб берсангиз?
- Ҳар ўйиндан олдин узоқдан зарба бер деб айтишар эди, ўша пайтда вақти келганини сезиб энг керакли лаҳзани пойлаб зарба бердим ва ўхшади. Бу гол бизни қўллаб-қувватлаб турган халқимиз учун бўлди.

- Ярим финалдаги ўша голингиз ҳозиргача бўлган фаолиятингиздаги энг чиройлисими?
- Албатта, бу шу бугунги кунгача урган энг чиройли голим.

- Ҳозирги ҳолатдан келиб чиқиб айтсак, Азиз Ғаниев эртага майдонга тушадиган бўлса ўша услубда гол уришга қодирми?
- Қодир. Насиб қилса эртага майдонга тушсам албатта чиройли гол уришга ҳаракат қиламан.

- Сизга узоқдан зарба беришни асосан ким маслаҳат беради ва бу борада кўпроқ ўргатиб туради?
- Мураббийлардан Рўзиқул ака Бердиев менга ҳамиша узоқдан кўпроқ зарба бер, сенда бу яхши чиқади деб айтадилар. Шу сабаб, жарима зарбаларини ҳам кўпроқ менга ишонишади.

- Қор ёғиб турган ва музлаган майдонда ўйналган финал ҳақида нима дея оласиз?
- Очиғи, бу нарсаларга унчалик эътибор бермадик. Биринчи бўлимдан сўнг ўйинни қолдирмоқчи ҳам бўлишган эди, лекин биз охиригача ўйнаймиз дедик. Совуқ ҳам, ноқулай об-ҳаво ҳам бизга ҳалақит қилмаслигини айтдик. Йигитлар билан бир тан бўлиб мақсадга эришдик. Ўша пайт оёқларимиз музлаб қолган эди, лекин югуриб қизиб олганимиздан кейин бу нарса билинмай кетди.

- Финалда Андрей Сидоров майдонга тушганидан кейин мураббий сизларга махсус кўрсатма бердими?
- Бу нарса ўйиндан олдин маълум эди. Яъни, агар зарур бўлса иккинчи ҳужумчини тушириб қанотлардан ҳаволатиб тўп ошириш ва кўпроқ эътиборни стандарт вазиятларга қаратиш тактикамиз олдиндан бор эди.

- Сизга ўтган йил "Динамо" (Киев) ва "Зенит" клубларидан қизиқиш бўлган эди. Ҳозирги кунда реал олиб қараганда қайси чемпионатларда ўйнаб кета олишингизга кўзингиз етади?
- Европа жамоаларида ўйнаб кетишга кучим етади, ўйнаб кета оламан насиб қилса.

- Ҳозир Осиёнинг гранд жамоаларидан таклиф тушса, пуллар Азиз Ғаниевни алдай оладими ёки Европада ўйнаш учун навбатингизни кутасизми?
- Айни пайтда ҳаракатларим Европага қаратилган, иложи борича Европани мўлжаллаяпман. Аниқ айтадиган бўлсам, пул энг биринчи ролни ўйнамайди.

- Сиз қайсидир футбол агенти ёки агентлиги билан ҳамкорлик қиласизми?
- Бир қатор агентлар алоқага чиқишди, лекин ҳозирча ҳеч бири билан шартнома имзоламадим. Бу борада шошилмаяпман, менинг тақдиримни клубим ҳал қилади.

- Ҳайдовчилик гувоҳномангиз борми?
- Ҳа.

- Демак, Малибуни ўзингиз миниб юрасизми?
- Нега энди, уни дадам миниб юрадилар. Уларга совға бўлади.

- Азиз Ғаниев келажакда Одил Аҳмедовдек бўла оладими?
- Насиб қилса, албатта бўлади. Шунга ҳаракат қиламан ва бунга кўзим етади.

- Агар эртага Рўзиқул Бердиев сизни майдонга туширишни мўлжалласа ва сиздан жисмонан тайёрлигингиз ҳақида сўраса, 2 кун олдин 120 дақиқа ўйнаган ўйинчи сифатида нима деб жавоб берасиз?
- Эртанги ўйинга тайёрмиз. Буни бутун халқимиз кутмоқда, агар майдонга тушсак ҳар қандай ҳолатда ҳам бор кучимизни берамиз ва гол уришга ҳам ҳаракат қиламиз.


Толибжон Қосимов ва Шаҳбоз Беғамов суҳбатлашди