Азамат Абдураимов: "Тошкентдаги йиғинимиз тайёргарликнинг асосий босқичи бўлади"

- “Навбаҳор” билан бўлиб ўтган ўйин хақида нима дея оласиз?
- Ўйин ўртоқлик мақомида бўлса-да жуда кескин руҳда кечди. Шогирдларим 3:2 ҳисобида ғалаба қозониб, стадионга ташриф буюрган мингга яқин мухлисларни хурсанд қилишди. Жамоамиз ҳали асосий таркибни шакллантириш йўлида ҳаракат қилмоқда. Мухлисларни олий лига мусобақаларида хурсанд қилиш мақсадида кўп изланишимиз ва меҳнат қилишимиз керак.

- Азамат Биродарович, бугунги кунда клубнинг олий лигада қатнашадиган асосий таркиби аниқланиб бўлдими?
-Йўқ, жамоа эндигина қиш мавсумидаги биринчи ўқув-йиғинини якунига етказди. Йигитларга уч кун дам берганимиздан сўнг навбатдаги йиғинни ўтказгани Тошкент шаҳрига жўнаб кетамиз. Тошкентдаги йиғинимиз тайёргарликнинг асосий босқичи бўлади. Пойтахтдаги машғулотлари давомида “NBU-Осиё”, “Оқтепа” ва яна бир нечта клублар билан назорат ўйинларини ўтказишни режалаштирганмиз. Кўриб турганингиздек бугунги ўйинда Норов, Магерамов, Тойлоқов, Султонов, Худоёров ва яна кўп ўинчиларни синовдан ўтказдик.

- Жамоага янги ўйинчилар таклиф этиладими?
- Мамлакатимиз олий лигасида тўп сурадиган клубларнинг савияси жуда баланд, шунинг учун Тошкентдаги машғулотларда бир нечта тажрибали легионер футболчиларни синовдан ўтказиш ниятимиз бор. У ерда сафимизга литвалик иккита ва яна молдавиялик бир ўйинчи келиб қўшилади.
 
Элмурод ЭРМАТОВ суҳбатлашди