Аюбхон Гаппаров: “Мақсадим бу йил “Навбаҳор”да ўйнаб жамоага фойда келтириш”

Шу боис у айни дамда “лочинлар”нинг ўқув-йиғин машғулотларида астойдил тер тўкмоқда. Куни-кеча 22 ёшли ҳужумчи билан қисқача суҳбатлашдик.

- Аюбхон, яқинда “Навбаҳор” бошқарув постига Бахтиёр Ашурматов олиб келинди. Буни жамоадаги футболчилар қандай қабул қилишди?
- Жуда яхши. Шахсан мен Бахтиёр акани олдиндан яхши билганим учун хурсанд бўлдим. Бу ёш мураббий билан илгари “Локомотив”да йўлларимиз кесишганди. Ёдингизда бўлса, “темирйўлчилар” сафига бориб қўшилганимда, Ашурматов у пайтда футбол ўйнарди.

 - Адашмасам, жамоа билан тузган шартномангиз ўз кучини йўқотган. Шундайми?
- Ҳа, тўғри. Ҳозир эркин агентман. Олдимда бир қатор таклифлар бўлишига қарамай, кўриб турганингиздек ҳамон “Навбаҳор” йиғинида иштирок этяпман. Чунки мақсадим бу йил ҳам “лочинлар”сафида ўйнаш. Наманганда туғилиб, вояга етдим. Эндиликда бу вилоят жамоаси учун ўйнаб, унинг ютуқларига ҳисса қўшишни истайман.

- У холда янги бош мураббий билан клубдаги келажагингиз тўғрисида гаплашиб олдингизми?
- Бу борада, стол атрофига ўтириб, жиддий суҳбатлашмадик. Лекин Бахтиёр ака менга ишонч билдиришини айтди. Ўз навбатида мен ҳам астойдил тер тўкиб, билдирилган ишончни оқлашга харакат қиламан.

- Аюбхон, хабарингиз бўлса керак, яқинда собиқ жамоангиз “Рубин”да катта ўзгариш бўлди. Яъни бунгача бош мураббий бўлиб келган Қурбон Бердиев истеъфога чиқарилди. Бунга қандай муносабат билдирасиз?
- Қозон жамоасидаги ички холатдан тўлиқ хабардор эмаслигим учун, аниқ бир фикр билдиришга ожизман. Лекин шуни айта оламанки, Бердиев клуб тизимида катта ҳажмдаги ишларни бажарган. Шахсан ўзим “Рубин”га борганимда, у киши менга клубга мослашиб кетишим учун кўп ёрдам берган. Қозон жамоасидаги фаолиятим орқали ҳар томонлама ўсишга эришганман. Ўйлайманки, Қурбон Бердиев бой тажрибага эга ва у кейинчалик узоқ вақт ишсиз қолиб кетмайди.

Исломбек РУСТАМБЕКОВ суҳбатлашди