Ахбор Имомхўжаевни андижонлик энг машҳур сухандон қутлайди

Ўзининг ширали овози билан ўз вақтида барчани ром этган 76 ёшли Раббано ота бугунги кунда Бухоро вилоятининг Олот туманида истиқомат қиладилар. Ўз мутахассислиги бўйича Ўзбекистон соғлиқни сақлаш аълочиси унвонигача эришган Раббано Камолович бугун қутлуғ – 80 ёшини нишонлаётган устоз, таниқли шарҳловчи, жонкуяр журналист, республика тоифасидаги ҳакам Ахбор Рустамович Имомхўжаевга ўзининг самимий табригини йўллади.

Ҳурматли Ахборжон ака!
Дунёга ўзбек футболининг нуфузини оширишдаги буюк хизматларингиз ҳар қандай таҳсин, эъзоз ва эътирофларга лойиқлиги бутун ёрқин фаолиятингиз мобайнида намоён бўлган. Сиздек ўз Ватани ва халқига фидойи, камтар, бағрикенг, мехридарё инсон, миллионлар ўйини - футболдаги бетакрор, жарангдор овозли шарҳловчи ва ижодкор сифатида машҳурлигингизга ҳаммамиз ҳавас қиламиз.


Табрик шеъри
80 баҳорингиз муборак бўлсин,
Футболнинг машъали Ахборжон ака!
Уйингиз нурафшон нурларга тўлсин,
Аллоҳ умрингизга берсин барака!

Шарҳловчилар сафида мисли сардор,
Ҳакамлик бобида етакчи шунқор.
Адиблик санъати сиз учун шиор,
Миллатнинг фахрийси, ғурури, АХБОР!


Сизга ҳурмат ва эҳтиром ила,
дўстингиз ва шогирдингиз Раббано Камолович Раҳмонов.
Бухоро. 2016 йил 19 февраль