Асрор Алиқулов: "Олий лигада Кенжаевга ўхшаган ҳимоячилар кам"

Тадбир якунида қашқадарёлик ҳимоячидан интервью олдик.

- Асрор ака, "Камолиддин Кенжаевга ёрдам берамиз!" хайрия акцияси ҳақида фикрингиз?
- Авваламбор мана шу тадбирни ташкил этган инсонларга катта раҳмат айтмоқчиман. Ўз вақтида яхши ўйинлар кўрсатиб, бироқ автофалокат туфайли футболдан четда қолган Камолиддин Кенжаевга ёрдам бериш орқали катта савоб ишга қўл урилди. Камолиддин Кенжаевга моддий ёрдам кўрсатилиши ўзбекистонлик футболчиларга нисбатан ҳеч кимнинг беэътибор эмаслигини кўрсатади. Мен хайрия акциясида иштирок этганимдан хурсандман. Шу баҳонада Камолиддиннинг ўзи билан, қолаверса анчадан бери кўришмаган футболчи ва мураббийлар билан учрашиб, ўзаро суҳбатда бўлдик.

- Тадбир ҳақида илк бор қачон эшитгандингиз ва қандай муносабатда бўлдингиз?
- Шундай тадбир ўтказилиши борасида биринчи марта хабар топганимда унда ҳали олий лигамиз якунига етмаганди. Тўғриси, мен ҳам кўпчилик қатори хайрия акцияси ҳақида championat.asia сайти орқали хабар топдим. Ўшанда ўқиган заҳотим хурсанд бўлгандим. Сайт ходимларига алоҳида раҳмат айтмоқчиман, улар катта ишни амалга оширишди.

- Мухлисларга Кенжаев тўғрисида нималар дея оласиз?
- Камол билан анча вақт елкама-елка тўп тепганмиз. Шунчалик яқинмизки, у худди укамдек бўлиб қолган. Ўша машъум воқеа юз бермасидан олдин Кенжаев ўнг қанот ҳимоясида жуда яхши ҳаракат қиларди, шунингдек терма жамоа аъзоси эди. Ҳозир ҳам олий лигада ўнг қанот ҳимоячилари кўп, лекин Камолиддин Кенжаевга ўхшаб зўр ўйин кўрсатадиганлари кам. Жуда тезкор, ақлли, ҳимоядан ҳужумга тез қўшиладиган футболчи эди.

Х.Холиқов суҳбатлашди.