Асрор Алиқулов 7:1 ҳисобидаги ғалабадан кейин: "Агар биринчи таймда гол урганимизда ҳисоб янада йирик бўларди"

Биринчи даврада илк мағлубиятимизни айнан "Зомин"дан қабул қилиб олгандик, ўша баҳсда ўз хатоларимиз туфайли ютқазгандик. Бугунги ўйинга футболчиларни тайёрлаш осон бўлмади, рақибдан реванш олиш учун ҳаракат қилдик. Бироқ биринчи таймда жуда ҳам шошдик ва 2-3 метрлардан ҳам гол ура олмадик. Биринчи бўлимда агар гол ўтказиб юборганимизда "Зомин"нинг иштиёқи ошарди, стандарт вазиятларда рақибга имконият бермасликни уқтиргандим. Иккита гол урилгунига қадар барчамиз кучли ҳаяжонда эдик.

- Йирик ҳисобга иккинчи тайм бошида урилган тезкор голлар сабаб бўлдими?
- Агар биринчи таймда ҳам гол урганимизда ҳисоб бундан ҳам йирик бўларди деб ўйлайман. Ҳисоб йириклашгач футболчилардаги босим йўқолди ва "Зомин" жамоасининг ҳимоядаги пала-партиш ҳаракатлари туфайли кўплаб голлар урдик.

- Жасур Холтўраев бугун 5та гол уриб пента-трикка эришди. Уни иккинчи тайм учун асраб қўйганмидингиз?
- Биз ёш футболчилардан асосан ҳужумда фойдаланамиз. Бошқа позицияда ёшлардан фойдалана олмаяпмиз. Шу боис Жасурни мажбур бўлаяпмиз иккинчи таймда туширишган.

- "Зомин" дарвозабони алмаштирилгач сиз ҳам дарвозабонни алмаштирдингиз. Бунга нима сабаб бўлди?
- Узоқ вақт давомида бир дарвозабонни ўйнатдик. Охирги ўйинларда асосий посбонимиз ишончсиз ўйини туфайли бошқа дарвозабон Акмал Раҳимовни тайёрладик. Мирзоҳидга дам бердик. Ҳисоб йириклашгани учун захирадан учинчи посбонни ҳам туширишга қарор қилдик.

- Худоёрхон Сагдуллаев учта жуда қулай вазиятдан фойдалана олмади...
- У жуда совуққон футболчи. Аммо унда бироз "пижонлик" ҳислати бор. Бу яхши футболчи бўлиб етишишига тўсқинлик қилади. Агар бундан воз кечса ва дриблингга кўп берилмасдан қора меҳнатдан қочмаса жуда кучли ўйинчи бўлади.

- Бугун қайси чизиқ сизни кўпроқ асабийлаштирди?
- Тўғрисини айтсам ҳар бир чизиқда кўплаб хатолар бўлди. Биринчи навбатда бу ҳимоя чизиғи. Ўйин қандай бўлса ҳам ҳимоячилар сергакликни йўқотмаслиги шарт.

- Бугун кўп голлар урилди, аммо мухлислар ўйин суръати паст бўлди деб ҳисоблашди.
- Биз ҳар бир ўйинда футболчилардан тезкорликни талаб қиламиз. Мавсумдаги 8-учрашувимиз. Дастлабки ўйинларда тезкорлик бор эди. Тезкорлик футболчиларнинг фикрлашига ҳам боғлиқ. Бунга барча футболчилар ҳам тайёр эмас.

- Футболчилик даврингизда энг йирик ғалаба қандай бўлганди?
- "Пахтакор"да ўйнаганимда 11:0 ҳисобида ютгандик.