Асқар Толибжонов билан дилдан суҳбат (1 апрель ҳазили)

Энди 20 ёшни қарши олган бўлишига қарамай, худди катталардаек фикрлаб, кўпроқ катталардан интервью олишни маъқул кўряпти.

Боя ишхонамизга ҳаллослаб кириб келган Нўъмонжон “Акалар, Фарҳод ака билан суҳбат қилиб бўлганимдан сўнг иш билан Терма жамоалар марказига боргандим, кутилмаганда марказ раҳбари Асқар Толибжоновни кўриб қолдим. У кишининг озгина вақти бор экан, шартта интервью олиб қўя қолдим”. Кейин компьютер олдига ўтирди-ю, интервьюни ёзишга киришди. Натижада қуйидаги суҳбат намоён бўлди.

-   Асқар ака, яхшимисиз? Ишлар билан чарчамаяпсизми?
-   Укам, яхшиман раҳмат. Мана терма жамоамиз кучлилар билан ўйнасин деб тинмай югуриб юрибмиз.
 
-   Айтганча, май ойида иккита ўртоқлик ўйинимиз бор экан. Тошкентда Уммон термаси жамоасига қарши. Шу ростми?
-   Бу гапни қаёқдан олдингиз?
 
-   Кеча интернетда чиқди.
-   Шу интернетга ҳам ҳар балони ёзаверишади. “Твиттер”, “Фейсбук” кабилар пайдо бўлди-ю, тинчгина ишлаб бўлмай қолди. Ҳа, биз Уммонга расмий таклиф юборганмиз, лекин ҳали жавоб келгани йўқ. Арабларни биласиз-у, ҳам айтади, ҳам қайтади. Сизга бир сирни очайми?

-   Майли, яхши бўларди.
-   У куни дўппини бир четга қўйиб бош қотириб кўрсам, ўзбек футболининг шунча йиллик тарихида Аргентина билан ҳеч ўйнамаган эканмиз. Хитой, Кореялар билан ўйнайвериб жуда зерикдик.
 
-   Ҳа. тўғри.
-   Шунда ўзимга ўзим кел, шу Аргентина билан икки марта ўйнай қолайлик дедим. Биттаси Тошкентда бўлади, биттаси Монтевидеода. Хуллас...

-   Узр, Асқар ака гапингизни бўламан. Нега айнан Монтевидео? Ахир бу шаҳар Уругвайнинг пойтахти-ку! Аргентина пойтахти эса Буэнос-Айрес.
-   Э, ука нима фарқи бор? Ўйин бўлса бўлди-да! Иорданиядан ўтганимизда Уругвай билан Монтевидеода ўйнардик, тўғрими? Шунга хаёл кетиб қолибди.
 
-   Ҳа, тушундим. Нима деб ўйлайсиз, Аргентина – кучли рақиб, улар биз билан ўйнашга кўнармикан?
-   Айтсам ишонмайсиз, боягина факсдан уларга хат юбордик. Хатга Месси келмайдиган бўлса, биз ҳам кўнмаймиз деган жойини қистириб ўтдим. Ҳатто бир йили қишда Мессининг Тошкентга келиб Чиғатойда югурганини ҳам қўшиб қўйдим. Биз ҳам футболдан узоқ юрганимиз йўқ, Мессини ёнидан кўрганмиз.
 
-   Фараз қиляпман Асқар ака, агар Месси келадиган бўлса, Тошкентда роса аншлаг бўлади. Кейин уларда Агуэро, Маскерано, Игуаин деган ўйинчилар ҳам бор.
-   Энди ука, мен уларни танимайман. Шу Мессини кўрганман, холос.
 
-   Аргентина келса, чипта нархиям шунга яраша бўлса керак?
-   Албатта. Ҳар ҳолда олий лига ўйинларидаги нарх бўлмаслиги аниқ. Биз буни маркетинг бўлими билан кўриб чиқамиз. Кейин шунга қараб нарх белгилаймиз.
 
-   Мабодо чипталар яна қўлга чиқиб кетмасмикин?
-   Мен тушунмаяпман, сиз журналистми ё терговчими? Майли, ука, шундоқ ҳам кўп вақтимни олдингиз. Ишларим ниҳоятда кўп. Ҳозир бориб Озарбойжон футбол федерациясига ҳам ўртоқлик учрашуви борасида хат юборишим керак. Аргентина келмаса, уларни чақирамиз.

-   Асқар ака, қимматли вақтингизни аямай, интервью берганингиз учун раҳмат.
-   Хўп, хайр.


Нўъмонжон Собиров