"Арсенал" Деклан Райснинг вакиллари билан алоқага чиқди

"Тўпчилар" ёзги трансферлар даврида "Вест Хэм" сардори Деклан Райсни сафига қўшиб олиш борасида музокараларга киришди. 24 ёшли футболчи ўтган ёзда клубни тарк этиши ҳақида жиддий хабарлар тарқалганига қарамай, "Вест Хэм" уни ўзида ушлаб қолишга муваффақ бўлганди. "Манчестер Юнайтед" катта маблағ таклиф қилганига қарамай, Райсни қўлга кирита олмади.

Райс мавсум якунланганидан кейин келажаги борасида ҳаракатга тушиши кутилмоқда. У Чемпионлар Лигасида ўйнаш истагини билдирган. Футболчи ҳозирги клуби билан шартномасининг охирги 18 ойига кирди. Клуб у билан битимни бир йилга узайтириш ҳуқуқига эга. Унинг трансфери учун 100 млн фунт атрофидаги таклифлар кутилмоқда.

Англия терма жамоаси аъзоси учун "Манчестер Юнайтед", "Манчестер Сити" ва "Ливерпуль" ҳам курашиши айтилмоқда. Бироқ улар орасида Райс энг кўп ўз таркибида кўришни истайдиган жамоа "Арсенал" эканлиги маълум. "Арсенал" ҳозирдан ҳаракатни бошлади ва футболчи учун ҳафтасига 200 минг фунт маош таклиф қилмоқда.

Деклан Райс жорий мавсум жами 28 та ўйинда иштирок этди.