АПЛ. "Ливерпуль" – "Тоттенхэм" ва бошқа баҳслар учун превью

Ўтган тур хусусида

Чемпионатнинг 12-турида мезбонлар атиги 4 та ўйинда ғалаба қозонишга муваффақ бўлишди. Ушбу мавсум натижаларини олдиндан айтиб бўлмаслиги ҳеч қачон ҳайратда қолдирмайди ва ўтган тур айниқса, ажралиб турибди.

2020/21 йилги мавсум жуда кам учрайдиган воқеаларга бой. Шундай қилиб, 12 йил ичида биринчи маротаба улар – “Манчестер Сити", “Челси", МЮ, “Тоттенхэм", “Арсенал" ва “Ливерпуль" битта турда зафар қуча олмадилар. АПЛ тарихида ҳеч қачон чемпионат етакчиси 12 учрашувдан сўнг 25 очко тўплаган эмас. Шунингдек, бу босқичда биринчи ва ўнинчи ўрин орасидаги фарқ ҳеч қачон етти очкони ташкил қилмаган.

Кучли учликнинг "қоқилиши" ҳамда "Саутгемптон" ва "Лестер"нинг ғалабалари эвазига жамоаларнинг жадвал юқорисидаги ўрни янада жипслашди. Худди шу нарса ўрта қаторда ҳам бор – олтинчи ўринни учинчи ўриндан атиги 3 очко ажратиб турибди. Бўлажак турда ҳам пешқадамлар яна очко йўқотишлари эҳтимоли мавжуд. Чунки бизни "Ливерпуль" ва "Тоттенхэм" ўртасидаги дуэль кутмоқда.

Турнинг асосий интригалари

"Кутилмаган парад" давом этадими?

Ҳатто клублар еврокубоклардаги сўнгги ўйинларда қўл урган ротацияларга қарамай, лидерларнинг муваффақиятсизликларини тиғиз тақвимга осонгина боғлаш мумкин. Масалан, "Тоттенхэм" 13 ҳафта ичида 22 учрашув ўтказган бўлса, "Кристал Пэлас" шу даврда 13 ўйин ўтказган. Бунинг ортидан катта захирага эга жамоалар ҳам очко йўқотишдан ҳоли эмас.

Ҳар қандай жамоа бир-бирини мағлуб эта оладиган лига шон-шарафини "Вест Бромвич" ва "Шеффилд Юнайтед"нинг жуда суст кўрсаткичлари бироз бузмоқда. Аммо бир кун улар ҳам бизни ажаблантириши мумкин. Фақат битта савол: қачон?

Ушбу ҳафтадан бошлаб клублар тенг шароитларда ҳаракат қилишади. Чунки "Бохинг дай"да ҳафтада икки тур бўлиб ўтади. Энди еврокубокларда ўйнамайдиган жамоаларнинг тикланиши учун камроқ вақт бўлади. Шундай қилиб, улар икки ой давомида тиним билишмайди. Ва бу нарса шуни кўрсатадики, ушбу омил натижаларни янада чалкашроқ қилади.

"Arteta out"

"Арсенал" қатъият билан пастга қараб шўнғишда давом этяпти. "Ҳужумга ўтишди, аммо қулга айланишди" деганлари шу бўлса керак-да. "Бёрнли" билан ўйинда Обамеянг ниҳоят гол урди, фақат ўз дарвозасига. Мавсум олдидан режалаштирилган кучли 4 ликка кириш мақсади амалда деярли лигада жон сақлаш ҳолатига келиб қолди. Лондонликлар 1959 йилдан буён биринчи марта кетма-кет 4 уй учрашувида мағлуб бўлишди. Голлар статистикаси ҳам худди шундай уятли. АПЛдаги 12 ўйинда 10 та гол – 1981/82 йилдан бери учрамаган энг ёмон кўрсаткич. Табиийки, англияликлар Микель Артетанинг "Асренал"ига нима бўлганлиги билан қизиқмоқда. Football London инсайдерлари испанияликнинг асосий футболчилар билан муносабатлари ёмонлашгани ҳақида бир нечта ахборотга эга бўлдилар.

Айтишларича, Артета "Лидс" билан учрашувда майдондан четлатилган Николя Пепени омма қаршисида танқид қилган, шундан сўнг тушунмовчиликлар юзага кела бошлаган. Кўплаб футболчилар машғулотларда иссиётсиз ёндашмоқдалар, шу қаторда "Бёрнли" билан учрашувда четлатилган Гранит Жакани ҳам кўрсатиб ўтиш мумкин. Сўнгги ҳафталарда Артетанинг Давид Луис билан муносабатлари кескинлашди. Манбаларнинг фикрига кўра, мураббий бразилиялик билан тўғридан-тўғри мулоқот қилмаяпти.

Испанияликнинг техник директор Эду билан ҳосил қилган дуэтига саволлар мавжуд. Айтилишича, бу жуфтлик 28 миллион фунт стерлингга сотиб олган Салибани менсимайди. Футболчи Эмерининг даврида жамоага жалб қилингани боис унга эътибор қаратилмаяпти. Қисқаси, "Арсенал"да ҳақиқий фалокат юз берди. Twitter'даги #Arteta_Out хештеглари энди ҳеч кимни ажаблантирмай қўйди ва четлатиш 13-турдан кейин содир бўлиши эҳтимоли йўқ эмас. "Арсенал" навбатдаги турда ўз уйида, лекин ҳозирда тўртинчи ўринда турган "Саутгемптон"га қарши ўйнайди...

Ҳозирги “Челси”да озроқ “носозлик” кузатилмоқда

Сўнгги турда лондонликлар кучли учликдагилар ичидан биринчи бўлиб қоқилишди. "Эвертон"дан учралган мағлубият икки сабабга кўра унчалик муҳим бўлиб чиқмади. Биринчидан, рақиблар орасидаги фарқ унчалик катталашиб кетмади. Иккинчидан, "Тоттенхэм" ва "Ливерпуль"нинг дуранглари туфайли бу нарса содир бўлмади. "Челси" кетма-кет 3 ўйинда гол ўтказиб юборди.

"Челси"ни олдинда кутилмаган тўқнашувлар кутмоқда. Лондонликлар "Вулверхэмптон" сафаридан кейин 6-ўринда бораётган "Вест Хэм", ундан сўнг "канонирлар" билан баҳс бўлиб ўтади.

Фрэнк Лэмпард жамоаси ўз дарвозаси дахлсизлигини сақлаш нима эканлигини эслаши билан бир қаторда яратилган вазиятлардан фойдаланишни билиши вақти келди. Акс ҳолда янги йилдан кейин мавсумнинг қолган қисми учун мақсадларни кўриб чиқиб, ўзгартиришга тўғри келади.

"Фулхэм" ва "Бёрнли" "тирик"

Ушбу мавсумда 4 та аутсайдердан 2 тасида "ҳаёт аломатлари" кўринмаяпти. Бу айниқса, "Бёрнли"га тегишли. Шон Дайч шогирдлари сўнгги 5 ўйиндан фақат 1 тасида мағлубиятга учрашди. Бу ўйинларда саккиз очко тўплашди. Тўхташ эҳтимолдан йироқ эмас. "Бёрнли" "Астон Вилла" билан меҳмон ўйинидан кейин "Вулверхэмптон", "Лидс", "Шеффилд Юнайтед" ва "Фулхэм" билан ўйинлар навбатда турибди. Менимча жамоа тақвимдан рози, чунки ўта мураккаб эмас.

"Фулхэм" ҳақида ҳам шу нарсани айтиш мумкин. Тўғри, тақвим мураккаброқ. "Брайтон" ва "Ньюкасл" билан учрашувдан сўнг "Саутгемптон" ва "Тоттенхэм" "бекат"да кутиб турибди.

Хуллас, "Вест Бромвич" ва "Шеффилд Юнайтед"дан фарқли ўлароқ, иккала жамоа ҳам омон қолиб, АПЛда қолиш истагини амалда намойиш этишмоқда.

"Вулверхэмптон" – "Челси" (15.12 23:00)

Иккала жамоа ҳам сўнгги турдаги омадсизликлардан ғазабланмоқда. "Вулверхэмптон"нинг мағлубияти айниқса, тажовузкор кўринишга эга. "Астон Вилла" билан ўйинда ҳаммаси 0:0га қараб кетаётганди, қўшимча вақтда "бўрилар" дарвозаси томон пенальти белгиланди ва у голга айланди. Нуну Эшпириту Санту шогирдлари 12 ўйиндан 5 тасида ютқазиб, 13-ўринни эгаллаб турибди.

"Челси" Англия Лига Кубогининг "Тоттенхем"га қарши ўйинида асосий вақтдаги дурангни ҳисобга олган ҳолда 17 учрашувдан сўнг биринчи марта мағлуб бўлди. Фрэнк Лэмпард "Эвертон" билан ўйиндан сўнг сўнгги 6 ўйинда атиги 1 та гол урган Кай Хаверцни ҳимоя қилди. У шунингдек, ушбу мавсумда мунтазам равишда қатнашмаётган Кристиан Пулишичнинг сафга қайтаётганини эълон қилди. "Вулверхэмптон"нинг йўқотиши – "Астон Вилла" билан учрашувда қизил карточка олган Жоау Моутиньюдир. 

"Манчестер Сити" – "Вест Бромвич" (16.12 01:00)

"Манчестер Сити" сўнгги тўрт учрашувнинг учинчисида аутсайдер билан учрашяпти. "Бёрнли" ва "Фулхэм" умумий 7:0 ҳисобида мағлуб этилди ва "Вест Бром"нинг улардан устунлигини тасаввур қилиш қийин.

"Тоттенхэм"дан 2 та гол ўтказиб юборган "шаҳарликлар" кетма-кет 3 учрашувда ўз дарвозаларидан тўп олиб чиқишмаяпти. Шунинг учун, журналистлар Агуэронинг ҳолати ҳақидаги саволга қўшимча равишда Гвардиоладан марказий ҳимоячилар мавзусида сўрашди – "Ляпорт нега ўйнамаяпти?"  

Ва Пеп бу саволга жавоб берди: "Стоунз-Диаш жуфтлиги соат каби ишламоқда, нега мен ниманидир ўзгартиришим керак?" 

"Вест Бромвич"га тўхталсак, таркибнинг ярмини йўқотган "Ньюкасл"дан очко ололмаган жамоадан ниманидир кутиш қийин. "Манчестер Сити" сафари уларга қимматга тушишини тахмин қилиш мумкин, холос.

"Арсенал" – "Саутгемптон" (16.12 23:00)

Агар бу Артета бошчилигидаги "Арсенал"нинг сўнгги ўйини бўлса-чи? Бу 13-тур олдидан кутилган умидлар. Ҳозирги "Саутгемптон" меҳмонда ғалаба билан ҳисоблашишга қодир.

Бундан ташқари, "Арсенал" қизил карточка олган Гранит Жакага қўшимча равишда сариқ карточкалари кўпайиб кетган Эктор Беллеринни қўшиши мумкин. Иккаласи ҳам дисквалификация туфайли ўйинни ўтказиб юборади. "Саутгемптон"да умуман йўқотишлар мавжуд эмас, ҳар ҳолда Ральф Хаззенхютль ўйинолди матбуот анжуманида шундай деди.

"Лестер" – "Эвертон" (16.12 23:00)

"Лестер" "Брайтон"нинг қаршилигини сезмади (3:0). "Эвертон" эса 7 ўйиндан 1 тасида ҳалабага эришиб, ҳали жамоа ўзида эканлигини кўрсатди.

"Лестер" ушбу мавсумдаги муваффақиятсиз натижалар билан ажаблантирмоқда, "тулкилар" "Манчестер Сити"ни сафарда мағлуб этиши мумкин, аммо ўз уйида "Фулхэм" ёки "Вест Хэм"га ютқазади.

Асосийси, "Лестер" футболчиларининг аксарияти жароҳатлардан йироқ, бу эса мезбонлар ғалабаси учун катта имконият яратади. Хуллас, қизиқ баҳс гувоҳига айланамиз.

"Ливерпуль" – "Тоттенхэм" (17.12 01:00)

Қизиқ, кимдир чемпионатнинг 13-турига келиб "Тоттенхэм" ва "Ливерпуль" ушбу учрашувга икки етакчи мақомида яқинлашади деб тахмин қилиши мумкинмиди "Мерсисайдлар"нинг охирги бир неча йилдаги мавқейи ҳеч кимни ажаблантирмайди, албатта. Аммо, "Тоттенхэм"...

"Тоттенхем" энди "Кристал Пэлас" билан бўлганидек бошқаларга очко бермаслиги лозим. Рақибларнинг ҳам очко йўқотгани "шпорлар" фойдасига хизмат қилди. Бундай лаҳзалар "Ливерпуль"га қараганда лондонликларга кўпроқ босим ўтказиши мумкин. Клопп жамоаси бир неча мавсумдан буён чемпионлик учун кураш олиб боряпти, бу уларга янгилик эмас, "Тоттенхэм"нинг кўплаб ўйинчилари учун эса бундай ҳиссиёт - янгилик.

Бундай пайтларда жамоаларнинг ҳозирги спорт формалари ҳар доим ҳам биринчи планга чиқавермайди. Бундай вақтда ирода, керакли натижа йўлида бирлашиш ва чидамлилик қобилияти қўл келади. Бу борада албатта, Жозе Моуриньюнинг улкан тажрибаси фойда келтиради. Португалиялик катта учрашувларда ўзига ишонади – у эҳтиёткорлик билан ўйнаб, тўпни рақибга беради ва ўз имкониятини кутади.

Лондонликлар охирги марта "Энфилд"да 2011 йили АПЛ доирасидаги баҳсда ғалаба қозонишган. Шу тариқа "шпорлар" "Ливерпуьл"га қарши сўнгги 26 учрашувдаги 1 та ғалабасидан ташқари 8 та дуранг ва 17 та мағлубиятни қайд этишган.

Клублар турнинг марказий учрашувида эҳтиёткор ўйин намойиш этишса керак, яна ким билсин.

"Шеффилд Юнайтед" – "Манчестер Юнайтед" (18.12 01:00)

"Шеффилд Юнайтед"га очиғи одамнинг раҳми келади. Жамоа жадвалнинг пастки қисмига маҳкам жойлашиб олган ва бир йилдан сўнг Чемпионшипдан АПЛга қайтиш имкониятини ўйлаб қолса ажабмас. 

"Манчестер Юнайтед" "Манчестер Сити" билан дуранг ўйнаганидан қониқди, бу яхши натижа сифатида баҳоланиши мумкин. 

"Шеффилд Юнайтед" кўпинча осонликча таслим бўлмайди – фақат вақти-вақти билан "Саутгемптон"дан 0:3 ёки "Челси" дан 1:4 каби даҳшатли мағлубиятларга учраб туради.

Шунингдек, ушбу турда қуйидаги ўйинлар ўтказилиши кўзда тутилган:

16.12 23:00 "Лидс" – "Ньюкасл"  

17.12 01:00 "Вест Хэм" – "Кристал Пэлас" 

17.12 01:00 "Фулхэм" – "Брайтон"

17.12 23:00 "Астон Вилла" – "Бёрнли"

Шерзод Нурматов тайёрлади.