Анвар Ҳожимирзаев: "Янги мавсумда совринли ўринлар учун курашамиз"

- Бугунги ўйин ҳақидаги фикрларингиз билан ўртоқлашсангиз...

- Менимча, ёмон ўйин бўлмади. Мухлисларимиз бизни қўллаб-қувватлаш учун узоқ масофани босиб ўтишди. Улардан миннатдормиз. Биз бугун боримизни бердик, аммо натижада шундай бўлиши керак экан. Бир очкони қўлга киритдик. Ўз уйимизда бўлиб ўтадиган кейинги ўйинга янада яхшироқ тайёргарлик кўрамиз.

- "Динамо"нинг жорий мавсумдаги стартини қандай баҳолайсиз? "Динамо" дастлабки тўрт баҳсда иккита дуранг ва шунча ғалаба қайд этди...

- Чемпионатни ёмон бошламадик. Бундан ҳам яхшироқ бўлиши мумкин эди. Масалан, бугун бир нечта вазиятларимиздан фойдалана олмадик. Бундан-да яхшироқ ва юқорироқ натижалар қайд этишга интиламиз.

- "Динамо" ўтган мавсумда анча ҳужумкор ва ёрқин ўйин кўрсатишига қарамай, жамоа мусобақа жадвалининг ўртасида қолиб кетган эди. Ўзбекистон Кубогида эса жамоа ўз иштирокини гуруҳ босқичидаёқ якунлаган эди. "Динамо"нинг янги мавсумдаги мақсадлари қандай? Апрель ойида Кубок баҳслари старт олади...

- Янги мавсумда совринли ўринлар учун курашамиз. Насиб қилса, Кубок баҳсларида чемпионликни қўлга киритишга ҳаракат қиламиз.

Абдулвосит Бектемиров суҳбатлашди