Анвар Бердиев: "Шўртан" уй жамоаси эмас. Про лигада очко осонликча қўлга киритилаётгани йўқ"

"Ўйин ҳақида нима ҳам дердим, оддий бўлмаган баҳсда ғалаба қозондик. "Дўстлик" жамоасида бош мураббий ўзгарган ва улар ўтган турда илк уч очкосини қўлга киритганди. Табиийки, руҳий кўтаринкилик бор эди. Худога шукур, олдимиздаги вазифани бажардик. Футболчиларимга борларини бергани учун раҳмат айтаман",- дейди Анвар Бердиев. 

- "Шўртан" уй жамоаси бўлиб қолаётганди. Сафарда эса кўп очколар йўқотмоқда. Бугун меҳмондаги илк 3 очкога эришилди. Бу рақиб даражасидан келиб чиқиб шундай бўлдими ёки жамоа рақиб майдонида қандай ўйнашни ўргандими?

- "Шўртан"ни уй жамоаси демаган бўлардим. Сафарда ҳам ўйинлар қийин ўтмоқда. Про лигада ўткинчи учрашувлар йўқ. Очколар осонликча олинмаяпти. Бу билан тўхтаб қолмоқчи эмасмиз. 

- Иккинчи бўлимда "Дўстлик" босимни оширган сари Шаҳбоз Нуриддиновда хатолар кўп кузатилди. Уни алмаштирмаслик захирада мос номзод йўқлиги билан боғлиқми ёки сизнинг ишончингиз?

- Захирамизда футболчилар бор. Шаҳбоз Нуриддинов ўзига юклатилган вазифани қўлдан келганча бажаришга ҳаракат қилди. Энди хатоларни кўриб чиқамиз ва устида ишлаймиз. 

- Биринчи давранинг ўртасидан ўтдик. "Шўртан" сиз истаган ҳолатга кириб боряптими?

- Истаймизми ёки йўқ таркибимизда янги футболчилар кўп эди. Улар бир-бирларини тушуниб олишлари учун вақт керак. Ўйлайманки, учинчи ва тўртинчи даврага келиб янада чиройлироқ ўйин кўрсатамиз.