"Андижон" иккинчи даврага тайёргарликларни бошлади. Бахтиёр Ҳамидуллаев вақтинча бош мураббий этиб тайинланди

Бугундан бошланган машғулотлар олдидан клубнинг янги раҳбари Журъатбек Қувватов асосий таркиб футболчилари билан учрашди.

"Авваламбор, барчангиз билан яна бир бор кўришиб турганимдан хурсандман. Андижон вилояти мамлакатимизда барча соҳада етакчи ўринларда юради. Жумладан фармацевтика борасида ҳам. Лекин жамоамизнинг ҳозирги эгаллаб турган ўрни нафақат вилоятимиз шаънига, балки таркибдаги футболчиларнинг номларига ҳам тўғри келмайди. Биз янги даврни бошлаяпмиз, вилоятимиз футбол соҳасида ҳам етакчи ўринларда юришига бел боғлаганмиз. Биз аҳил жамоа бўлиб ўйнасак, ишласак, албатта кўзлаган мақсадимизга етамиз. Биз нафақат Суперлигада қолишимиз, балки юқори ўринларни эгаллашимиз керак. Бугун Виктор Кумиков билан дўстона хайрлашдик. Эндиликда жамоани Андижон вилояти футболининг тирик афсонаси, ўтмишнинг ажойиб тўпурар футболчиси Бахтиёр Ҳамидуллаев бошқариб туради. Бош мураббий масаласини шу кунларда ҳал қиламиз"-деди Журъатбек Қувватов.

Бахтиёр Ҳамидуллаев: "Эгаллаб турган ўринга лойиқ эмасмиз"

Бугундан иккинчи давра ўйинларига тайёргарликни бошлаган "Андижон" жамоасини Бахтиёр Ҳамидуллаев вақтинча бошқариб турадиган бўлди.

Футболчилар билан ташкил этилган учрашувда Бахтиёр Ҳамидуллаев ўз фикрларини билдириб ўтди.

"Аввало менга билдирилган ишонч учун миннатдорман. Таркибдаги аксарият футболчиларни яхши танийман. Яқинда чемпионатнинг юқори ўринларида турган жамоа билан турнир жадвалининг сўнгги ўринларини эгаллаб турган жамоаларнинг ўзаро ўйинларини томоша қилдим. Айтарли, катта тафовут йўқ. Демоқчи бўлганим барча жамоа билан ўйнаса бўлади.  Ҳозирги эгаллаб турган ўрин умуман бизга ярашмайди. Биз Суперлигада қолиш билан бир қаторда юқорироқ ўринлар билан чемпионатни якунлашимиз керак"-деди Бахтиёр Ҳамидуллаев.