Худойбердиев “Андижон” машғулотларида. Эркиновга таклиф юборилди

Мураббийлар штаби режага кўра, биринчи босқич йиғинида кун-ора назорат синов ўйинлари орқали футболчиларнинг имкониятларини кўздан кечирмоқда. Ўтган йили жамоа шарафини ҳимоя қилган деярли барча футболчилар шартномаси якунига етгани сабабли, бошқа клубларга ўтиб кетди. Шу боис энди “бургутлар” таркиби янгитдан шакллантирилмоқда. Табиийки, селекция ишлари жадал суратда олиб борилмоқда.

Championat.asia сайтига маълум бўлишича, мураббийлар ҳужум чизиғини кучайтириш мақсадида Шаҳбоз Эркиновга таклиф юборган. “Бунёдкор”нинг 34 ёшли ҳужумчиси ҳозирча аниқ жавоб айтмаган ва ҳозирда “қалдирғочлар” сафида шуғулланиб турибди.

Куни кеча “Андижон” лагерида Улуғбек Худойбердиев пайдо бўлди. Ўтган мавсум ПРО-Лигада Фарғонанинг “Истиқлол” жамоасида ўйнаган ҳимоячи ҳозирча кўрикдан ўтмоқда.

Бунгача Андижон” ёшлар жамоасида ўйнаб, асосий таркибга жалб этилган Муҳаммадсолиҳ Убайдуллаев, Муҳаммадали Турсунов, Юрсунали Топволдиев, Рустам Қўчқаров, Саиджон Маҳаммадинов, Шохруҳ Раҳмидинов каби маҳаллий футболчиларга жавоб берб юборилган. Айни дамда ушбу футболчилар вилоят иккинчи лигасида иштирок этадиган “Пойтуғ” жамоаси машғулотларида иштирок этаётганини айтиш лозим.