Александр Гейнрих: «Локо» раҳбарияти билан чиқишмай қолдик ва ўзаро келишувга кўра жамоани тарк этдим»

— "Янги мавсумга Тошкентнинг "Локомотив" жамоаси билан тараддуд кўраётган эдим. Бироқ клуб раҳбарияти билан чиқишмай қолдик ва кейинчалик ўзаро келишувга кўра жамоани тарк этдим. Шунга қарамасдан Тошкентда ўз спорт формамни ушлаб туришга ҳаракат қилдим. Шундан сўнг "Ордабаси" клубидан расман таклиф тушди ва мен бу чорловни хурсандчилик билан қабул қилдим. "Ордабаси"нинг Европа лигасида ўйнаши бу катта плюс. Бу нарса мен учун ҳам катта чорлов бўлади. Футболчи сифатида ушбу нуфузли турнирда муносиб қатнашишга ҳаракат қиламан. Шунингдек, жамоамиз учун ҳам бу жуда муҳим мусобақа бўлади", - дея ўз фикрларини билдириб ўтди Александр Гейнрих.

— Баъзи ОАВда сизга "Иртиш" жамоаси ҳам қизиқиш билдираётганлиги ҳақида хабарлар пайдо бўлганди?
— Мен "Локомотив" йиғинларида қатнашаётганимда павлодарликлардан қизиқишлар бўлиб турганди. Аммо расмий таклиф билан менга мурожаат этишгани йўқ.

— Виктор Кумиков билан танишмисизлар?

— Шахсан таниш эмасман, лекин ушбу мутахассис ҳақида кўплаб маълумотга эгаман. Виктор Кумиков ўз вақтида Ўзбекистон чемпионатида ҳам фаолият юритган ва иш услубидан қисман хабардорман. Анча қаттиққўл ва талабчан мураббий деб биламан.

— "Ордабаси" футболчиларидан кимларни танийсиз?

— Кўпчилиги билан танишман. Айниқса Андрей Сидельников билан яқин дўстмиз. Бизнинг оилавий борди-келдимиз бор. Андрей менинг энг яхши дўстларимдан бири. "Ордабаси"да бирга ўйнашимиз бу ҳам бир плюс бўлади. Менинг асосий мақсадим - бу жамоамнинг ҳар бир турнирда муносиб иштирок этиши ва ғалабаларни қўлга киритиши.