Александр Андроникашвили: "Андижон"га ўтишим жуда тез ва кутилмаганда содир бўлди"

Тез орада таркибга қўшиладиган ушбу ўйинчи клуб матбуот хизматига дастлабки интервьюсини берди.

— “Андижон” клубига ўтишингиз қандай юз бергани ҳақида тўхталиб ўтсангиз.

— Биласизми, ҳаммаси жуда тез ва кутилмаганда содир бўлди.

— Адашмасам, сиз “Дила” жамоаси билан иккита соврин ютдингиз. Энди “Андижон” билан ҳам бирга соврин ютмоқчидирсиз-а?

— Ҳа, 2025-йил бу борада муваффақиятли бўлди. Мен “Андижон” билан максимал мақсадлар учун курашиш борасида қўлимдан келадиган ҳамма нарсани қиламан.

— Фаолиятингизда илк бор легионер сифатида четда тўп тепасиз. Бунгача нега легионерга айланмагансиз?

— Илгари ҳам вариантлар бор эди. Лекин мен тўғри вақтни ва тўғри танлов учун жамоани кутаётгандим. Ишончим комилки, бу қарорим муваффақиятли бўлади.

— Ўзбек футболини ва хусусан “Андижон” ҳақида нималарни билардингиз?

— Ўзбекистонда футболни жуда яхши кўришларини эшитдим. “Андижон”га келсак, уларнинг ўзига хос мухлислари борлигини биламан.

— “Андижон” клубидан таклиф ҳақида эшитганингизда илк фикрингиз қандай бўлди?

— Менга кўп нарсалар ёқди. Аввало, мураббий, мухлислар, машғулот базаси ва стадион.

— Янги жамоада қайси рақамда ўйнашни хоҳлайсиз?

— Бу унчалик муҳим эмас. Лекин 6-рақам яхши бўларди. Чунки мен бу рақам билан муваффақиятли мавсумларни ўтказганман.

— Яна бир грузиялик футболчи — Ашортия ҳам “Андижон”да тўп тепади. У билан ҳам гаплашдингизми?

— Ҳа, албатта. Мен у билан гаплашдим ва Ўзбекистонда ўйнаш тажрибасига эга бўлган грузин жамоадошимга эга бўлиш жуда ёқимли.