"Ал Ваҳда" "Ал Айн"ни тўғридан-тўғри йўлланмадан маҳрум қилди

Отабек Шукуров ўйнаётган "Шаржа" чемпионликни қўлга киритганидан хабарингиз бор. Иккинчи ўрин Дубайнинг "Шабаб Ал Аҳли" клубига насиб этди. Учинчи ўрин учун ҳам кураш қизғин кечди. 

Охирги турда Абу Дабининг "Ал Ваҳда" клуби ўз майдонида "Ал Айн"ни қабул қилиб 1:0 ҳисобида ғалаба қозонди. Ягона гол 87-дақиқада Себастьян Таглибау томонидан киритилди. Ушбу ғалабадан сўнг "Ал Ваҳда" ҳисобидаги очколар сонини 46тага етказиб, "Ал Айн" билан тенглашиб олди ва фақат тўплар нисбатига кўра чемпионатни юқори ўринда тугатди. 

Бундан ташқари БАА чемпионатида 25та ўйинда майдонга тушган Таглибау 27та гол билан мавсум тўпурари бўлди. "Ал Ваҳда"нинг охирги турда ғалаба қозониши "Ал Айн"нинг келаси йил ОЧЛда тўғридан-тўғри гуруҳда қатнашмаслигини таъминлади. 

Шундай қилиб 2020 йил БААдан учта жамоа - "Шаржа", "Шабаб Ал Аҳли" ва "Ал Ваҳда" ОЧЛ гуруҳ ўйинларида иштирок этади. "Ал Айн" эса ўз омадини плей-офф раундида синаб кўради.