“Ал Муҳаррақ” бош мураббийи: "Насаф"га қарши ўйин осон ўтмаслиги аниқ"

ОФК кубоги-2021 финал учрашуви олдидан матбуот анжумани бўлиб ўтди. Унда "Ал Муҳаррақ" жамоаси устози Иса Садун Ал Ҳамдани ва жамоа етакчиларидан бири Ҳамза Ал Жубан иштирок этишди. 

“Ал Муҳаррақ” бош мураббийи Иса Садун Ал Ҳамдани: "Биз финал ўйинига жиддий ҳозирлик олиб бордик. Ушбу мусобақада олдин ҳам ғолиб чиққанмиз. Бу борада тажрибамиз мавжуд. Энди олдинда “Насаф” клубига қарши жиддий учрашув кутиб турибди, лекин биз ижобий натижага умид қиляпмиз. 

"Ал Муҳаррақ" ҳали Ўзбекистон клубларига қарши ўйнамаган. Бу галги учрашув биз учун янги тажриба бўлади. Лекин биламиз, Ўзбекистон чемпионати кучли, клублари ҳам анча савияли. Қолаверса, ўзбекистонлик футболчилар Европада ҳам ўйнай бошлашди. Яқинда Италия чемпионатида ўзбек футболчиси ўйинини кузатдим. Умуман олганда, ўзбек клубига қарши ўйин осон ўтмаслиги аниқ. 

Рақибни яхши ўрганишга уриндик. Таркибида анча маҳоратли ўйинчилар бор эканини биламиз. Қолаверса, “Насаф”нинг етакчи ҳимоячиларидан бири учун мавсум жароҳат сабаб аллақачон якунланганидан ҳам хабаримиз бор". 

“Ал Муҳаррақ” футболчиси Ҳамза Ал Жубан: "Жамоамиз финал ўйинига 100 фоиз тайёр. Ўзбекистон жамоалари ҳамиша мазмунли ўйин намойиш этишади, буни жуда яхши биламиз, аммо мақсадимиз – ғалаба қозониш. Бунинг учун бор маҳоратимизни ишга соламиз".

Эслатиб ўтамиз, "Ал Муҳаррақ" ҳамда "Насаф" ўртасидаги финал баҳси эртага Тошкент вақти билан 21:00 да старт олади.