“Ал-Айн” - “Насаф” учрашуволди расмий тадбирлари ҳақида

Клубимиз делегациясини “Ал-Айн” клуби расмийлари кутиб олишди. Шундан сўнг жамоамиз ўзларига ажратилган “Hili Rayhaan by Rotana Hotel” меҳмонхонасига жойлашишди. Бироз ҳордиқ чиқаришгач, жамоамиз стадион томон йўл олишди ва Ал-Айндаги дастлабки машғулотларни ўтказишди.

Эртага, 2 май душанба куни “Ал-Айн” – “Насаф” учрашуви олдидан бир қатор расмий тадбирлар ўтказилади. Дастлаб, соат 13:00да ҳар иккала жамоалар вакиллари ўртасидаги расмий учрашув бўлиб ўтиши режалаштирилган.

Шундан сўнг ўйинолди матбуот анжумани ўтказилади. Матбуот анжумани Ал-Айн шаҳридаги "Hazza bin Zayed Stadium"да бўлиб ўтади.

Бизнинг вақт билан 14:00да бошланадиган матбуот анжуманининг дастлабки қисмида “Ал-Айн” бош мураббийи Златко Далич ва жамоанинг бир нафар ўйинчиси иштирок этади.

Матбуот анжуманининг иккинчи қисми соат 14:30да бошланади. Унда жамоамиз бош мураббийи Рўзиқул Бердиев ҳамда бир нафар ўйинчимиз иштирок этишади.

Ҳар иккала клуб менеджерлари иштирокидаги митинг соат 18:00да бошланади.

Жамоамизнинг ўйинолди расмий машғулоти "Hazza bin Zayed Stadium"да соат 21:30да  бошланади.