Абдусамад Дўрмонов: "Керакли ўйинда муҳим уч очкони қўлга киритдик"

"Осон бўлмаган ўйин ўтказдик. Учинчи ўйинндирки сафарда ўйнаяпмиз. Йигитлар вазиятни тушуниб туришган эди. Бундай ўйинларга кучли тайёргарлик билан чиқиш керак. Футболчиларимга раҳмат айтаман. Кўрдинглар, қизиқарли ўйин бўлди. Яратилган вазиятлардан фойдаландик. Кейинги ўйинга тайёргарликни бошлаймиз. Бўшашимиз керак эмас. Олдинда яна учта ўйинимиз бор. Олдимизга қўйилган вазифани бажаришга ҳаракат қиламиз",- дейди Абдусамад Дўрмонов.

- "Нефтчи"ни Суперлигада деб тасаввур қилсак бўладими? Ўзингиз ишоняпсизми?

- Бунга ҳаммамиз ишонамиз. Лекин шошилишимиз керак эмас. Ҳали олдинда яна учта ўйин бор. Бугун керакли ўйинда ғалаба қозондик. 

- Иккинчи бўлимда жуда кўп тўхталишлар бўлди. Ҳакам эса уч дақиқа қўшиб берди. Бунга сиз қандай қарайсиз?

- Бу саволга аниқ жавоб бера олмайман. Ҳакамларни назорат қиладиган инсонлар бор. Бундай баҳсларда ўйин чўзиш ҳолатлари кўп бўлади. Ҳакамлар эса вазиятни ўзи ҳал қилади. Бизнинг вазифамиз ўйинимизни ўйнаш. 

- Сизнингча бугун ким учрашувнинг энг яхши футболчиси бўлди?

- Бизда ҳамма ҳаракат қилди. Бугун ҳимоя ва ярим ҳимоя чизиғи вакиллари яхши ҳаракат қилди. Битта ўйинчини ажратиб кўрсатиб бўлмайди. Жамоавий ўйин бўлди. Ҳамма меҳнат қилди ва борини берди.