А Серия, 4-тур. Превью

Мавсумни Спалетти қўли остида кўтаринки руҳда ўтказаётган "Интер" "Кротоне"га сафар уюштиради.

А Серияда йўқотишларсиз кетаётган "Интер" тўхтатиб қолиш "Кротоне"нинг қўлидан келишига ишониш қийин. Чунки "Кротоне" ҳозирга қадар нафақат очко ишламаган, балки рақиблар дарвозасини ҳам ишғол этмаган. "Милан", "Верона" ҳамда "Кальяри" дарвозасига йўл топа олмаган Давиде Никола шогирдларининг Хандановичнинг дарвозасига "калит" топиши мушкул масала.
Давиде Никола ўтган мавсумда жамоани А Серияда олиб қолишга эришганди. Янги мавсумда ҳам Никола олдига қўйилган асосий вазифа шу.

"Интер" эса мавсумни жуда ажойиб темпда ўтказмоқда. Ўтказилган учта ўйинда максимал очко тўплаган жамоа рақиблари дарвозасини 8 бор ишғол этган. Лучано Спалетти қураётган жамоа нафақат ҳужумда самарадор ўйнамоқда, балки ҳимояда ҳам тартибли ҳаракат қилмоқда.
"Интер" жорий мавсумда чинакамига жиддий мақсадларни кўзласа бўлади. Чунки жамоанинг ҳозирги потенциали "Ювентус" ва "Наполи"га ҳам чемпионлик учун жиддий кураш таклиф этишга қодир.

Куннинг иккинчи баҳси "Фиорентина" ҳамда "Болонья" ўртасида кечади.
Мавсумни жуда хунук бошлаган Пиоли жамоаси ўтган турга келиб ниҳоят узоқ кутилган ғалабани нишонлади. "Верона" дарвозасига меҳмонда 5 марта йўл топган "Фиорентина" руҳий босимдан чиқиб кетгани аниқ. Энди эса ўз уйида ўтган ҳафта "Наполи"дан "тарсаки" еган "Болонья"ни қабул қилади. Бу икки жамоада ҳозирда икки хил руҳий ҳолат. "Фиорентина" ниҳоят ўзига келди, "Болонья" эса "Наполи"дан учралган мағлубиятдан кейин бироз тушкунликка тушган. Турнир жадвалида ёнма-ён кетаётган ушбу жамоалар ўртасидаги беллашув анча қизиқарли ўтиши кутилмоқда.

Ўтган турда ноқулай об-ҳаво туфайли дам олган "Рома"  Римда "Верона"ни меҳмон қилади.
Эйсебио ди Франческо жамоаси ўз уйидаги охирги иккита ўйинда ғалаба қозона олмади. Иккинчи турда "Интер"га ютқазган "Рома", ЕЧЛда "Атлетико" билан дуранг қайд этди. Шу боисдан ҳам "Олимпико"га келадиган "Рома"нинг ишқибозлари жамоасининг ғалабасини анча соғиниб қолишди. Бу сафар "Рома"ни хато қилишга ҳаққи йўқ. Акс ҳолда Эйсебио ди Франческо кескин танқидлар остида қолиши мумкин.
"Верона" эса ўтган ўйиндаги шармандали мағлубиятдан кейин "Рома" қарши кураш таклиф этиши жумбоқ.
Бу ўйинда "Рома"га ғалаба керак, "Верона" эса очко сув ва ҳаводек зарур.

Эртага эса турнинг қолган барча учрашувлари ўтказилади.

Якшанбанинг илк учрашуви "Сассуоло" - "Ювентус".
Аллегри жамоасининг А Сериядаги ишлари доимгидек аъло. ЕЧЛда "Барселона"дан йирик мағлубиятни қабул қилиб олган "Юве"га ички чемпионатда ҳар ким ҳам муаммо туғдира олмайди.
Лекин Аллегри жамоага келганидан буён жамоа ҳар гал мавсумни йўқотишлар билан бошларди. Бу йили эса ҳозирча А Серияда жамоа бир текис кетмоқда. ЕЧЛда эса Аллегрининг мавсум стартидаги синдроми давом этди.
"Ювентус" ҳали ўзининг оптимал спорт формасига кириб олгани йўқ. Жамоа ўйинида баъзи камчиликлар кўзга ташланмоқда. Ҳимоя ва ярим ҳимоя ўртасидаги боғлиқликларда муаммолар бор. "Сассуоло" эса айнан шу жиҳатга эътибор қаратиб, "Юве"дан очко олишга уриниб кўриши мумкин. Кристиан Буччи жамоаси учун мавсум яхши бошланмади. Жамоа ҳозирча ғалаба нималигини билмай келмоқда. "Сассуоло"нинг мавсумдаги илк ғалабаси "Ювентус" устидан қозонилса, бу жамоага катта ишонч бағишлаши аниқ. Аммо бу ишни уддалаш  "Сассуоло"нинг қўлидан келишига ишониш қийин.
"Сассуоло" 2015 йилда ўз уйидаги баҳсда "Ювентус"ни мағлубиятга учратганди. Бу ғалаба "Сассуоло"нинг "Юве" устидан қозонган ягона ғалабаси. Қолган барча ўйинларда "Ювентус" рақибига имконият қолдирмаган.

А Серида ўтган турда "Лацио"га йирик ҳисобда мағлуб бўлган ва учрашувда деярли ҳеч нарса кўрсата олмаган "Милан" бу гал "Удинезе" билан куч синашади.
"Милан" "Лацио"дан учралган мағлубият аламини Европа лигасида "Аустрия"дан олишга эришди.
Аммо А Сериядаги рақиби "Удинезе" билан Монтелланинг алоҳида ҳисоб-китоби бор. Чунки бу жамоалар ўртасидаги ўтган мавсумдаги ҳар иккала учрашувда ҳам "Удинезе" "Милан"ни мағлуб этган. Ўтган йилги "Милан" билан ҳозиргисини ўртасида катта фарқ бор. Жамоа буткул янгиланди. "Удинезе" эса деярли ўша-ўша.
Янгиланган, кўпчилик назарида кучайган "Милан" ўша "Удинезе"ни енга оладими? Бу саволга жавобни эртанги ўйиндан кейин билиб оламиз.

Турнир жадвалидаги учта пешқадамдан бири "Наполи"нинг бу турдаги "ўлжа"си - "Беневенто" бўлади. А Сериянинг янги меҳмонига бу турдаги сафар анча қийин бўлади. "Наполи" А Серияда "Ювентус"нинг чемпионлик учун курашдаги потенциал жиҳатдан энг яқин рақиби. Маурицио Сарри ЕЧЛдаги муваффақиятсиз ўйиндан кейин бу ўйинда жамоани янада жиддийроқ тайёрлаши аниқ. "Беневенто" эса ўтказилган учта турдан кейин ҳали очко ишламаган ягона жамоа бўлиб турибди.
А Серия дебютанти учун Неаполдаги меҳмондорчилик қимматга тушиши мумкин.

Ҳали мағлубиятга учрамаган иккита жамоа ўртасидаги баҳс ҳар доим қизиқарли ва кескин курашлар бой бўлади. Шу боисдан Туриндаги "Торино" ҳамда "Сампдория" ўртасидаги беллашув анча қизиқарли ўтиши кутилмоқда. Турнинг энг эътиборга молик ўйини айнан Туринда бўлиб ўтади.
Куч жиҳатдан бир-бирига мос ва тенг рақиблар Туринда учрашишади. Синиша Михайлович ва Марко Жампаоло қарама-қаршилигида тактик кураш кечиши аниқ.

Симоне Инзаги қураётган "Лацио"га бўлган ҳурмат тобора кучайиб бормоқда. "Лацио"ни нафақат А Серияда, балки европада ҳам ҳурмат қилишни бошлашлари аниқ. "Лацио"нинг ажойиб ўйинлари ва қайд этаётган натижалари бунга сабаб бўлмоқда.
Ўтган турда "Милан"ни попугини пасайтириб қўйган "Лацио"нинг Генуяга сафар қилади. "Женоа" меҳмони бўладиган "Лацио"га Иван Юрич ҳужумкор ўйин таклиф қилиши аниқ. "Женоа" ҳар доим ўз уйида ҳужумкор футбол намойиш этади. Симоне Инзаги жамоасига эса бу таклиф ёқиши аниқ. Иккита ҳужумкор услубни хуш кўрадиган жамоалар қарама-қаршилигидан аввало мухлислар ютишади. Ўртага қўйилган 3 очкони кимга насиб этишини эса ўйин кўрсатади.

А Серия, 4-тур. Турнир жадвали

16 сентябрь, шанба.
"Кротоне" - "Интер" (18:00)
"Фиорентина" - "Болонья" (21:00)
"Рома" - "Верона" (23:45)

17 сентябрь, якшанба.
"Сассуоло" - "Ювентус" (15:30)
"Милан" - "Удинезе" (18:00)
"Наполи" - "Беневенто" (18:00)
"СПАЛ 2013" - "Кальяри" (18:00)
"Торино" - "Сампдория" (18:00)
"Кьево" - "Аталанта" (21:00)
"Женоа" - "Лацио" (21:00)